بیروڕا
بزووتنەوەی كوردی ڕۆژهەڵات و لۆمپەنیزمی سیاسی
وەحید کەماڵی

( بەشی سێهەم و كۆتایی)

لێرەدا دەبێ ئەم پرسیارە ئاراستەی خۆمان ( وەك كورد و بزووتنەوەی ڕزگاریخوازی نەتەوەیی ڕۆژهەڵات ) بكەین كە ڕەنگدانەوەو كاریگەری چەمكی لۆمپەنیزم لەپاڵ باقی ڕەهەندەكانی سیاسەتی دوژمنكارانەی نەیارانی كوردی ڕۆژهەڵات و كۆماری ئیسلامی تا چ ڕادەیەك توانیوییەتی زەربە لە هێزەسیاسییە كوردییەكان بەتایبەتی و بزاڤی ڕزگاریخوازی كوردی بەگشتی بدات و كەسایەتی نۆخبەی كوردی ڕوژهەڵات و هێزە سیاسییەكان تاچەند تووشی ئەم نەخۆشییە ببوونەتەوە ؟

ئەگەر بەدوور لە لایەنگری حیزبی و سیاسی و گرێدراو بوون بە هەر ڕێبازێكی فیكری و سیاسی بمانەوێت كەسایەتی هێزە سیاسییە كوردییەكان و نۆخبەی كوردی ڕۆژهەڵات لەم بوارەدا هەڵسەنگێنین بە بێ هیچ دودڵی و گومانێك دەبینین كە شەپۆلە بەهێز و نێگەتیڤەكانی چەمكی لۆمپەنیزم لە ئێران زیاتر بەری كورد كەوتوون و بە لەبەر چاوگرتنی تایبەتمەندییەكانی ئەم چەمكە كە پێشتر ئاماژەیان پێدرا بۆمان ڕوون و ئاشكرا دەبێت كە هەم وەك تاك و نۆخبە و هەم وەك هێزە سیاسییەكان تا چ ئاستێك هەڵگری ئەم كولتوورە وێرانگەرەین.

كولتوری خراب كردنی یەكتر و لۆمپەنیزمی سیاسی بووە بە دیاردەیەكی بەهێز لە نێو نۆخبەی كوردی وحیزبەكان و ئەمە خەسارەتێكی زۆری داوە بە هەیكەلی سیاسی حیزبەكان و بەردەوامی تاكی ئازادیخوازی كورد لە ناو بزاڤی كوردی ڕۆژهەڵات .

خرابەكاری لە ناخ و دەروونی  بزووتنەوەی ڕزگاریخوازی،بێ ڕێزی كردن و بێحۆرمەتی بە نۆخبە سیاسی و كولتووری و مەدەنیەكان و بەها بەنرخەكانی گەل و تێكوشەرانی سیاسی - كۆمەڵایەتی كورد و فیتنەگەری و دووبەرەكی خستنە نێو ڕیزی خەباتكاران و هێزە سیاسیەكان و تاوانباركردنی تێكوشەرە بەردەوامەكان و زۆر گوفتار و كرداری نەشیاوی دیكە تەنها لەلایەن كۆماری ئیسلامی و شاخ و باڵ و داردەستەكانی ئەنجام نادرێت بەڵكۆ بەشێكی زۆری ئەم سیاسەتە بە نەزانی یاخود بە زانا بوون لەلایەن نۆخبەی لۆمپەنی كورد پەیڕەو و جێبەجێ دەكرێت ، نۆخبەی لۆمپەنی كورد لە هەموو بوارەكاندا وەكو هەموو لۆمپەنێكی دیكەی ئێرانی هەوڵ دەدات و تێدەكوشێت كە كەم و كوڕییەكان و ناتەوانی فیكری و سیاسی و بەردەوام نەبوونی شۆڕشگێڕانەو شكستە سیاسی و مەدەنییەكان و سەرنەكەوتنی خۆی بخاتە ئەستۆی ئەوانی دیكەو كۆمەڵگاو هێزەسیاسییەكان و ناكارامەیی سیاسی و شۆڕشگێڕانەی خۆی بكاتە مۆڵكی غەیرەخۆی و دیگەران، بۆیە دەبینین بە هەڵبژاردنی توندترین شێوەكانی ڕۆخاندن و بە بێ لەبەرچاوگرتنی هیچ پرەنسیپێكی مرۆڤانە،ئەخلاقی یاخود شۆڕشگێرانە هێرش دەكاتە سەر تێكوشەرە بەردەوامەكان و بە ڕەفتاری لۆمپەن مەنیشانەی خۆی خرابترین تۆمەتە ناڕەواكان ئاراستەی دەوروبەر و لایەنەكانی دیكە دەكات . زۆرجار دەبیندرێت كە كەسانێك كە لە سیاسەت و تێكوشانی حیزبی و نەتەوەیی و چالاكییەمەدەنییەكان و...ناكاریگەر و پەك كەوتوو ( منفعل ) و سەرنەكەوتوو ببوونەتەوە لەجیاتی ئەوەیكە ژیانێكی غەیرە سیاسی و ئاسایی و ڕێزدارانە (محترمانە) بگرنە بەر و یاخود ببنە پاڵپشت و ئەزموونە باشەكانییان نەقڵی جیلی تازەی خەبات بكەن كەچی بە پێچەوانە دەبینین لەژێر سێبەر و پۆششی چەمكی فڵان ئایدیاو ڕێباز، یان لایەنگری فڵان كەسایەتی حەقیقی و حقوقی كورد و فڵانە حیزب تێدەكۆشن كە ئەوانی دیكە بەدناو بكەن یان كەسایەتی تاكێك یان گرۆپ یان حزبێكی سیاسی بڕۆخێنن،لەحاڵێكدا ئەگەر ئەو كاتەی كە لەسەر هەر ڕێبازێك  یان ئەندامی هەر لایەنێكی سیاسی ، حیزبی یان مەدەنی بووبوون ئەوەندەی كە ئێستا بەهەموو هێزی خۆیان هەوڵی ڕۆخاندن خەڵكی دیكە دەدەن، تێكۆشانی كردارییان بوایە ئەستەم بوو بە ئاسانی تووشی شكست ببن یان واز لەو ڕێبازە بێنن.

نۆخبەی لۆمپەن لە ڕاستیدا مرۆڤێكی ئێرادە لاواز ، ئۆپۆرتونیست ،ڕڤیزیونیست ، كاریاریست و هەڵگری واتای وەرشكەستەگی سیاسییەو تا ئەو كاتەی لەگەڵ شۆڕش و تێكۆشانی سیاسی و مەدەنی بەردەوام دەبێت كە بەرژەوەندییەكانی پارێزراو بن و هەركات هەست بكات ئەو هەلومەرجەی كە تێدایە لەمپەر لەبەرانبەر ئامانجە كەسییەكانی دادەنێت و جیلێكی تازەپێگەیشتوو هاتوونەتە مەیدان و باشتر و مودێرنتر لە ئەو دەتوانن درێژە بە تێكۆشان بدەن ، یەكسەر سەنگەر چۆڵ دەكات و هەوڵی ڕۆخاندن و تێكشكاندنی غەیرەخۆی دەدات و ئەوەی وشەی نەشیاوە وەكۆ " جاسوس ، ناپاك (خائین )،بەكرێگیراو ...لەدژی ئەوانی دیكە بەكاردەهێنێت.

دەمێكە كە نۆخبەی لۆمپەن لە ناو هێزە سیاسییەكانی ڕۆژهەڵات  جێگەو پێگەی خۆیان قایم كردووەو بەردەوامی بە هەبوون و كاریگەری نەرێنی خۆیان دەدەن لەسەر تاكی شۆڕشگێر و حێزبە سیاسیەكان و قەبارەی گشتی بزووتنەوەی ڕزگاریخوازی گەلی كورد لە ڕۆژهەڵات . هەرچەندە ئەم توێژە  هەرچەند ساڵ جارێك بە دروستكردنی كێشەو گرفت و بەربەست لە پێش جۆڵانەوەی كوردی  ڕووی ڕاستەقینەی خۆیان دەردەخەن و زۆریشیان واز لە حیزبە سیاسییەكان و بزووتنەوەی كوردی دێنن یاخود ڕوو لە وڵاتانی دەرەوە دەكەن یان ئەڕۆنە باوەشی هێزە ئەمنییەكانی سەر بە دۆژمن یاخود خۆیان دەفرۆشن بە دەزگایەكی ئەمنی بەڵام بەشێكیانیش بە هەر شێوەیەك بووە بە دەستەبەركردنی پلەو پۆستێكی حێزبی مسۆگەركراو (هەڵبەت بە شێوازێكی مافیایی) درێژە بە بەردەوامی خۆیان دەدەن لەناو حێزبە سیاسییەكان و وەك دۆمەڵێكی شێرپەنجەیی (غده سرگانی) لەدەمار و خوێنی حێزب دەمژن و خۆیان بەخێو دەكەن . ئەم كەسانە بە هۆی ئەوەیكە لەناخی كەسایەتی خۆیاندا بڕیاری تەواوی شۆڕشیان نەداوەو حێزب و شۆڕش وەك ئامرازێك بۆ دابینكردنی بەرژەوەندییەكان و گەیشتن بە ئامانج و عوقدەكانیان و درێژەدان بە ژیانی كەسی دەبینن، بستەر و ژێرخانێكی زۆرباشن بۆ سەرهەڵدانەوەی گەندەڵی سیاسی و رێكخراوەیی و دروستبوونی كوتلەو باڵ و مافیاو كەسایەتی كڵاوبەرداری سیاسی و حێزبی.

هەر بەو شێوەیەی كە لۆمپەنەكانی ناو كۆمەڵگا هێز و توانای زۆری خۆیان لە دواكەوتوویی و سوننەتی بوون و فەقری فكری و كولتووری خەڵك وەردەگرن بە هەمان شێوەش لە ناو حێزبە سیاسییەكان نۆخبەی لۆمپەنی سیاسی، هێزی خۆی لە دواكەوتوویی و نەخوێندەواری و فەقری فكری و كەم ئەزموونی كادێر و لاوازی چەمك و واتای كەسایەتی شۆڕشگێرانە لە پەروەردەی حێزبی و بەدەنەی حێزب وەردەگرن و دەبنە هۆی لەبار چوونی بڕیارە گرینگەكانی حێزب و كەسایەتییە دڵسۆزە شۆڕشگێرەكان كە لە پێناو پێشخستن و مۆدێڕن كردنی  بزووتنەوەی كوردی ڕۆژهەڵات دراون.

 كەم نین ژمارەی نۆخبە لۆمپەنەكان لە ریزی سەركردایەتی حێزبە سیایسیەكانی ڕۆژهەڵات كە لەجیاتی هەوڵدان و تێكۆشانی ڕاستەقینەو شۆڕشگێڕانە بوونەتەوە بە كەسایەتییەكی بۆروكراتی كلاسیك و هەموو هەوڵیان ئەوەیە كە هەلومەرجی هەنووكەیی (وەزعی مەوجوود) بپارێزن ، چوونكە یەكەم زۆر لەم دۆخە ڕازین و دووەمیش لە ڕاستیدا مانەوەی خۆیان و ئەو ئیمكاناتە بەلاش و فراوانە كە بە خۆڕایی لەبەر دەستییانە تەنها بە ڕاگرتنی ئەم دۆخە لەبارە (هەڵبەت بۆ خۆیان ) و ڕوونەدانی هیچ چەشنە گۆڕانكارییەك مسۆگەر دەبێت ، بۆیە بە دڵنیاییەوە دەتوانین بڵێن كە نۆخبەی لۆمپەنی جێگرتوو لە سەركردایەتی حێزبە سیاسییەكان یەكێك لە هۆكارە هەرەسەرەكییەكانن لە زەمین گیر كردنی بزووتنەوەی كوردی ڕۆژهەڵات و حێزبە سیاسییەكان % . هەبوونی ئەم توێژە لە ریزی كادێر و ئەندامان بەتایبەتی لەئاستی ڕێبەرایەتی حێزبەكان مەترسییەكی زۆر بەهێز وجیددییە بۆ ئەو جیلە نوێیەی كە بەشداری شۆڕش و حێزبەكان بوونەتەوەو یاخود لە داهاتوودا دەبن ، چوونكە وەكوو دەزانین بەشێكی زۆری ئەو كەسانەی كە لە كۆمەڵگاوە دێنە ریزی شۆڕش و حێزبەكان لەو كەسانەن كە بەهۆی كێشەو گرفتە جۆراوجۆرە كۆمەڵایەتیەكان یاخود ئالوودە بوون بە چەمكە خرابەكانی پەرەپێدراو لەلایەن دەسەڵاتی كۆماری ئیسلامی و كۆمەڵگاوە ڕوو لە حێزبەكان دەكەن و بە پێناسەیەك دەتوانین بێژین كە " پەنا بۆ حێزبەكان دێنن لە خراپەكانی ناو كۆمەڵگا " ، بەڵام بە هۆی هەبوونی لۆمپەنە سیاسییەكان لە ریزی بەدەنەو هەروەها لە ئاستی ڕێبەرایەتی حێزبەكان و هەبوونی بستەر و زەمینەی خۆڵقێندراو بۆ بەردەوامی چەمكی لۆمپەنیزم لە ناو حیزبەكان لە لایەن نۆخبەی لۆمپەنی سیاسی ، دووبارە تووشی هەمان كەش و هەوای تا ڕادەیەك وەك پێشووتر دەبن بۆ بەردەوامی دان بە كەسایەتی لۆمپەنی خۆیان  بەڵام ئەم جارە بە پێناسەیەكی دیكەو لەژێر چەتری پرستیژی سیاسی و حیزبی و دەبنە ئامراز و بە كرێگیراوی مافیای لۆمپەنیستی ناو حێزبەكان . 

لەلایەكی دیكەوە حێزبە سیایسیەكان بە ڕاسپاردنی ئەرك و بەرپرسیارێتی حێزبی بە كەسایەتی لۆمپەن ( بە بێ ئەوەی پێشتر پەروەردەیەكی باش و ڕاست و دروستی سیاسی و حێزبی پێ بدەن و دڵنیا بن لە گوڕانكاری كەسایەتی تاكی ناو حێزب ) هەم مەوجوودییەتی حێزب و پرەنسیپەكانی شۆڕش دەخەنە مەترسییەوەو لە لایەكی تریش بە جۆرێك لە جۆرەكان چارەنووس و پاشەڕۆژی خەباتی نەتەوەی كورد دەخەنە ژێر كاریگەری نەرێنی بڕیاری پەسەند كراو لەلایەن توێژی لۆمپەنی سیاسی و دەبنە ڕێگاخۆشكەر بۆ هەموو چەشنە خراپەكاری لە ناو حێزبە سیاسییەكان و كۆی گشتی خەباتی سیاسی نەتەوەیی كوردی ڕۆژهەڵات.

ناوەندی بڕیاری حێزبە سیاسییەكان دەبێ باش بیر لەوە بكەن كە كەسایەتی لۆمپەن و نۆخبەی لۆمپەن بە تێگەیشتن و ئاگاهی سیاسی تێپەڕی ڕەوتە سیاسییەكان نابن و تەنها بە هاندانی ( تحریك) هێزێكی سیاسی  یا لە ڕووی هەستی بە دوور لە زانستی سیاسی پەیوەندی بە لایەن یان حێزبێكی سیاسی دەكەن  بۆیە خودی ئەم توێژە بە حوكمی سرۆشتی ناخی كەسایەتیان خۆبەخۆ هەڵگر و پەیرەوكەری زۆر چەمكی ناپەسەند و خرابەن و لایەنگری توندوتیژی ، كرداری تێكدەرانە ، ترس و تۆقاندن و زۆر بەزم و ڕەزمی دوور لە تەربییەت و پەروەردی سیاسی و شۆڕشگێڕانە دەكەن و كە دێنە نێو حێزبەكان و خۆیان لە ژێر سێبەری بەرژەوەندییەكانی نۆخبەی لۆمپەنی دەسەڵاتداری حێزبی دەبینن ، زۆر بە ڕاحەتی دەكەونە خزمەتی گەندەڵكارانی ناو حێزب و سیاسەت و بە قەوڵێك بۆ گەیشتن بە نان و نەوایەك دەبنە خۆش خزمەتترین كەسان بۆ پێشبردنی بەرژەوەندی و مانەوی نۆخبەی لۆمپەنی سیاسی لە سەر دەسەڵاتی حێزبە سیاسییەكان .

نۆخبەی لۆمپەنی سیاسی بە تایبەت نۆخبەی لۆمپەنی كورد خاوەن كەسایەتییەكی زۆر لەرزۆكن و بە تەعبیرێك " بە دەم بادەوە شەن دەكەن " زوو بە زوو ڕێباز و ڕێبەرەكانیان دەگۆڕن و لە هەر شوێن و كاتێك هەست بە مەترسی بكەن بە خێرایی ڕێباز و قیبلەی سیاسی خۆیان ئاڵ و گۆڕ دەكەن  . لۆمپەنی سیاسی هەموو كاتێك لەبەرانبەر دووڕێیانی هەڵبژرادن ( انتخاب ) لە نێوان چینی پێشكەوتووخواز و ڕەنجدەر  لەگەڵ هێزەپاشكەوتووخوازەكان و كەسایەتییە داگیركەرەكان ، لایەنی ئەمەی دووەمیان دەگرێت كە خاوەنی دەسەڵات و هێزن . بیرۆكەی لۆمپەنیزم هەمووكاتێك لەنێو حێزبە لۆمپەن زەدەكان ڕەواجی دەبێت و نۆخبەی لۆمپەنی سیاسی دەسەڵات بەدەست بەردەوام هەوڵی ئەوە دەدات كە چەرخی پێشچوون و پێشبردنی سیاسەتەكانی حێزب بە دەستییەوە بێت یاخود بەلانی كەم بە گوێرەی بەرژەوەندییەكانی ئەم بسووڕێتەوە ، بۆیە دەبێنین كە بە هۆی كاریگەری ئەم توێژە لەسەر بەدەنە و ڕێبەرایەتی حێزبەسیاسییەكان كولتووری لۆمپەنیزم لە ناو حێزبە سیاسییەكان تا ئەو ڕادەیە پەرەدەستێنێت كە دەبێتە هۆی ئەوەیكە هیچ چالاكییەك و مۆروچینییەكی ( مهرە چینی) حێزبی بە بێ زەدووبەند و پەیوەندییە ناڕەواكان (نامشروع) جێبەجێ نەكرێت و لە كۆتاییدا حێزبی سیاسی شۆڕشگێڕ لە ژێر كارێگەری كولتووری لۆمپەنیزم و سێبەری دەسەڵاتی نۆخبەی لۆمپەنی بریار بەدەست ، لە ڕێگاو رێبازی ڕاستەقینەی خۆی پەرتەوازە دەبێت و دەكرێتە كۆمپانییایەكی سیاسی كە هەموو شتێك لێدەوەشێتەوە غەیری شۆڕش و تێكۆشانی نەتەوەیی.

نۆخبەی لۆمپەنی كورد لە ڕووی چینایەتی و چەشنی شكڵ گرتنی ستراكچەر و هەیكەلی حێزبیش كاریگەرییەكی زۆر بەرچاو و نەرینیان هەبووە لەسەر پێناسەی ساختار و پەیوەندییەكانی نێوخۆیی حێزبی و بوونەتە بە هۆكاری بەردەوامی چەمك و سیستەمی دواكەوتووی " ئاغاوەتی و دەرەبەگایەتی " ( فئودالیزم و ارباب رعیتی) لە نێو حێزبە سیاسییەكانی ڕۆژهەڵاتی كوردستان و بۆیە حێزبە سیاسییەكان جیاواز لەو پێناسەیەی كە لە خۆیان دەكەن و سەرەڕای ئەو ئامانج و درۆشمانەی كەلە ئەساسنامەو مانیفست و پەیڕەو پرۆگرامەكانیان هاتووەو و نووسراوەتەوەو تا ڕادەیەكی زۆریش هەڵبەت بە ڕواڵەت ڕەنگی مۆدێرنیزمیانیش پێوە دیارە بەڵام لە ئەمری واقیع و لەكرداردا وە بەهۆی ئەوەیكە نۆخبەی لۆمپەنی سیاسی كورد لە نێو حێزبەكان دەرفەتی ئەوەیان بۆ ڕەخساوە كە موناسباتی دەروون حێزبی بە گوێرەی ویست و كولتووری لۆمپەنیستی خۆیان دیاری بكەن، بۆیە تایبەتمەندییەكانی شێوازی ژیانی ئاغا و دەرەبەگایەتی و كوێڵەداری مۆدێرن و باڵباڵێنەو حامی پەروەری و ژیانی تۆخی چینایەتی و ناعیداڵەتی تەبەقاتی  و چینی بەهرەمەند و چینی بێ بەهرە و كەمینەی سەردەست و زۆرینەی بندەست و سەروەر و نۆكەر و ئەو داب و نەریت و هەڵسۆكەوتانەی كە تایبەتن بە ساختاری ژیانی فئودالیستی و ئەرباب و ڕەعیەت مەنێشی بووە بە دیاردەیەكی پەسەندكراو و ڕەوا لە نێو حێزبە سیاسییەكان ، لە حاڵێكدا كە فەڵسەفەی بنەڕەتی و مێژوویی زانستیی دامەزڕان و لەدایكبوونی هەموو حێزبە سیاسییەكانی ڕۆژهەڵاتی كوردستان خۆ تەرخانكردن بووە لە پێناو گەیاندنی نەتەوەیەكی زوڵم لێكراو بندەست بە مافە سەرەتایی و ڕەواكانی و خزمەت بە ئەم بەشە لە مرۆڤایەتی .

ئەفلاتوون وتەیەكی هەیە كە دەڵێت : من هیچ ڕێگایەكی باوەر پێكراو بەرەو خۆشبەختی نابینم بەڵام ڕێگایەك دەناسم كە دەگاتە شكست و ناكامی ...!

ڕاست و دروستی وتووە ئەفلاتوون  ، وە دەتوانین ئەم وتەیە بەم شێوەیە بیگونجێنین لەگەڵ دۆخی زاڵبوونی كولتووری لۆمپەنیزم لەسەر تاكی نۆخبەی سیاسی كورد و كولتووری لۆمپەنیزمی سیاسی لە ژیانی حێزبە سیاسییەكان كە " تەنانەت ئەگەر ئەو ڕێباز و شێوازەی كە حێزبە تێكوشەر و سیاسییەكانی ڕۆژهەڵات كە لەسەر ئەو ئەساسە دامەزراون و چەندین هەزار گیانی پاك بەختكراوە لە پێناوی، نەبێتە هۆی ڕزگاربوونی نەتەوەی كوردی ڕۆژهەڵات ، بەڵام بێگومان دەسەڵاتداری و مەیدانداری كولتوور و داب و نەریتی " لۆمپەمیزمی سیاسی  زاڵبوو لەسەریان ، هەبووەو دەبێتە هۆی شكست و بێ هیوایی بزووتنەوەی ڕزگاری خوازی كوردی ڕۆژهەڵات .%

بمانەوێت یان نەمانەوێت ، دانی پێبنین یاخود هەوڵی نكۆڵی لێكردنی بدەین ، ڕاستی ئەوەیە كە ئەم كولتوور و كەسایەتییە ڕێگر و بەربەستێكی سەرەكییە لە پێشخستنی دۆزی ڕەوای نەتەوەی كورد لە ئێران و لە كوردستان .جا ئەگەر ئەوەندە جسارەتمان ببێت و بە دوور لە خۆبایی بوون قبووڵی بكەین كە تووشی ئەم پەتایە ماڵوێرانكەرە بوویین جا بێگومان مشووری ئەوە دەخۆین كە چوون دەتوانین لە سیستەم و كولتوور و  نۆخبەی لۆمپەنیستی ناو شۆڕش و حێزبەكان ڕزگارمان بێت ؟

ئەركەكان جیاوازن و هەركامە لە میللەت و تاكی سیاسی ناو حێزبەكان و خودی  حێزبەكان ( مەبەست ڕێبەرانی ڕاستەقینەو كۆڵنەدەری حێزبەكانە) دەبێ ڕێ و شوێن و هەڵویستی تایبەت و جیاچەشنیان ببێت لە بەرانبەر كولتوور و چەمكی لۆمپەنیزم و تاكی كوردی لۆمپەنی سیاسی.

هەرچەندە لە سیستەمێكی حێزبی لایەنگر پەروەر و ئالوودەی بیرۆكەی بەرژەوەندی خوازانە  زۆر زەحمەت و ئەستەمە كە بتوانین هەنگاو هەڵگرین بەرەو نەهێشتنی كولتوور و ڕێبازی لۆمپەنیزمی سیاسی ، چوونكە  گەندەڵی و بێ قانوونی و سست بوونی كەسایەتی سیاسی لە نێو حێزبی ئاوەهادا بووە بە هۆی بەهێزبوونی پایەكانی كولتووری لۆمپەنیزم و موحافیزەكاری كەسایەتی تاكی شۆڕشگێر و خەباتكار و تۆخبوونی بەرژەوەندییە شەخسییەكان زاڵ بوونەتەوە بەسەر مەسڵەحەتە گشتی و نەتەوەییەكان بەڵام دیسانەوەو سەرەڕای هەموو گیر و گرفتەكان دەبێ وا سەیری ئەم بابەتە بكەین كە " هیچ ڕێگایەكی دیكەمان نییە غەیری ئەوەیكە شكست بە چەمكی لۆمپەنیزم و كەسایەتی لۆمپەنی سیاسی كوردی بهێنین " و بۆ ئەم مەبەستەش ڕوڵی نۆخبەی سیاسی مێشك خاوینی كورد لە ناو حیزبەسیاسییەكان گرینگ و كاریگەرە.

چەمكی لۆمپەنیزمی سیاسی سەرەتا دەبێ لە كەسایەتی ڕێبەرایەتی حیزبەكان و تەشخیس بدرێت و سەركونە و مەحكوم بكرێت و بۆ ئەم مەبەستەش دەبێ ئەو ئەندامانەی كە لە ڕێبەرایەتی حیزبەسیاسییەكان جێگایان گرتووەو هەڵگری ئەو تایبەتمەندییانەن كە لە سەرەوە ئاماژەیان پێدرا دەبێ بە وردی خۆیان بچنەوەو هەوڵ بدەن كە شێواز و چەشنی ژیانی سیاسی و كەسایەتی خۆیان بگۆڕن و ئەگەر وانەكرێت دەبێ ئیرادەی عامی ڕیبەرایەتی حیزب و باقی ئەندامانی حێزب لێپێچینەوەیان لەگەڵ بكەن و ناچاریان بكەن یا خۆیان بگۆڕن یان لابدرێن لە دەسەڵات و پلە وپایەی حیزبی.

بابەتی پەروەردە و فێركردنی ژیانی ڕاستەقینەو دروستی سیاسی و موبارزاتی ئەندامانی حیزب خاڵێكی دیكەیە كە دەبێ بەشێكی زۆر لە توانا و كات و پۆتانسییەلی كادری ڕێبەرایەتی و حیزب بۆی تەرخان ببێت و تەنانەت پێاچوونەوەیەكی سەردەمیانە لە چەشن و شێوازی پەروەردەكردن و ناوەڕۆك و نەوعی  وانەكان بكرێت و زۆر پێویستە كە بابەتی لۆمپەنیزمی سیاسی و تایبەتمەندی كەسایەتی لۆمپەنی سیاسی یەكێك لە سەرەكیترین وانەكان بێت كە لە فێرگە سەرەتاییەكانی حیزبی و ناوەندەكانی پەروەردەی حیزب دەوترێن .

بۆ بەرەنگاربوونەوە لەگەڵ ئەم چەمكە هیچ رێگایەكی زانستی تر و بەبەرهەم و كەم هەزینەتر نیە جگە لە گرینگی دان و پەرەدانەوە بە بابەتی پەروەردە چوونكە چەمكی لۆمپەنیزم سیاسی وەكو تایبەتمەندی و داب ونەریت لە كەسایەتی مرۆڤەكان جێگر دەبێت و زیاتر بەرهەمی فێربوونەوەو وەرگرتنی تایبەتمەندی كولتوری و خوو و سرۆشتی توێژێكی تایبەتەو بۆ سڕینەوە یاخود كاڵكردنی هۆكارەكانی لە ناخی كەسایەتی سیاسی و مرۆڤەكان  دەبێ دۆشێكی كەسایەتیان پێبدرێت كە بتوانن خۆیان رزگار بكەن لەو چەشنە نەخۆشییە كارەسات سازە ، بۆیە سووربوون و پێداگری لەسەر بابەتی " پەروەردەی بەردەوام " لەپێناو ڕۆخاندنی كەسایەتی لۆمپەن و دروستكردنی كەسایەتی شۆڕشگێر ، بەهێزترین چەك و دەرمانە بۆ خاوێن كردنەوەی ناوماڵی حیزبی سیاسی و بزوتنەوەی كوردی ڕۆژهەڵاتی كوردستان وە ڕێبەرایەتی حیزبە سیاسییەكان دەبێ بە پیلانێكی تۆكمەو زانستیانە وە  لە ڕوانگەو چوارچێوەی " پرۆسەی ژیانی بەردەوامی سیاسی " نەك  "پرۆژەیەكی كورتماوە یاخود وەرزی " سەیری ئەم بابەتە بكەن .

هەڵكردنی ئاڵا و درۆشمی " پەروەردەی بەردەوام داهاتوومان مسۆگەر دەكات " دەتوانێت وەرچەرخانێكی مێژوویی بێت بۆ لەدایكبوونی كەسایەتی شۆڕشگێڕی مودێرن و ڕزگار بوون لە كوێڵایەتی سیاسی و نەتەوەیی.

كۆتایی

 

ئەم بابەتە روانگەی نووسەرەکەیەتی و رۆژهەڵات نیوز لە ناوەڕۆکی بەرپرسیار نییە.
103 جار خوێندراوه‌ته‌وه‌