بیروڕا
"بزووتنەوەی كوردی ڕۆژهەڵات و لومپەنیزمی سیاسی "
وەحید کەماڵی

(بەشی یەكەم)

پێناسە : وشەی لومپەنیزم یان لومپەن (Lumpen) لە زمانی ئەڵمانییەوە وەرگیراوە و ئەم وشەیە لە بواری واتای وشە و چەمك بە كەسێك دەوترێت كە ئەندامی هیچ گرۆپ یاخود چینێكی تایبەت نەبێت و هەژار و كوێرەوەر بووبێت و لە تەبەقەو جێگەو پێگەی خۆی دابڕابێت و بە مرۆڤێكی بێ ئیش و كار لە قەڵەم دەدرێت .(سەرچاوە : ویكی پدیا ).

لەم بابەتە دەمەوێت چەندە كۆرت و پۆختیش بێت ئاماژە بدەم بە هەبوونی ئەم چەمكە لە ناخی كەسایەتی حقوقی بزوتنەوەی كوردستانی ڕۆژهەڵات و كاریگەرییەكانی لەسەر تاكی كورد و حێزبەكوردییەكانی ڕۆژهەڵات و بزانین تا چەن ئەم چەمكە هۆكار بووەو لە لایەن دوژمن و دۆستەنەزانەكان بەكارهاتووە بۆ شكاندنی خەباتی ڕزگاریخوازی نەتەوەی كورد لە كوردستانی ڕۆژهەڵات؟

دوای ئاوارە بوون و دوور كەوتنەوەی هێزە كوردییەكانی ڕۆژهەڵاتی كوردستان و جێگر بوونیان لە خاكی هەرێمی كوردستان چی لە ڕوی ناچاری یاخود بە زۆرەملی و ویستی هێزی نەیار (كۆماری ئیسلامی ) ، قەبارەو هەیكەلی گشتی بزۆتنەوی سیاسی نەتەوەیی ڕۆژهەڵاتی كوردستان بە تایبەت هێزە سیاسییەكان كەوتنە بن هەژموونی راِستەوەخۆ و كاریگەری و چوارچێوەی بەرژەوەندییەكانی حكومەتی هەرێم و هێزە سیاسیەكانی دەسەڵات بە دەست لە هەرێمی كوردستان و سیاسەتەكانی ناڕاستەوخۆ و جارو باریش ڕاستەوخۆی كۆماری ئیسلامی بەنیسبەت بزوتنەوەی كۆردی ڕۆژهەڵات بەگشتی و حێزبەكانی ڕۆژهەڵات بەتایبەتی ، بە واتای دیكە حێزبە كوردییەكانی ڕۆژهەڵات و بزاوتی كوردی ڕۆژهەڵات بوونە سووتەمەنی و كارتی یاری سیاسی و دیپلۆماتیك لە نێوان حێزبەكانی دەسەڵاتدار لەهەرێمی كوردستان و دەسەڵاتی كۆماری ئیسلامی و كەوتنە بەر شەپۆلە بەردەوامەكانی سیاسەتی ناوچەیی و ململانیەكانی ناوخۆی هەرێمی كوردستان و دەوڵەتانی دەوروبەر و دەرئەنجامی بەردەوامی ئەم دۆخە و ساڵانی درێژی دوور بوونەوە لە خەڵكی ڕۆژهەڵاتی كوردستان بە ڕوونی لەبەر چاوی هەمووانە.(ئەمە سەرەڕای ئەوەیە كە لەم یك دوساڵی دواییە هێزە كوردییەكانی ڕۆژهەڵات بە هۆی گوڕانكارییەكان لە ناوچەكە و ئەو دۆخەی ئێستا كۆماری ئیسلامی تێ كەوتووە توانیویانە تا ڕادەیەكی كەمیش بێت هەستانەوەیەك لە خۆیان دروست بكەن و هەنگاو بەرەو سیاسەتی هاوبەش بە نسبەت تێكۆشانی خۆیان بۆ ڕۆژهەڵاتی كوردستان هەڵگرن ...).

نامەوێت زۆر بڕۆمە ناو وردەكارییەكان و بڕوام وایە هەموو تاكێكی كورد كە بەدواداچوون بۆ دۆزی كوردی ڕۆژهەڵات دەكەن باش دەزانن دەستكەوتە نێگەتیڤەكانی ئەو سەردەم و قۆناغە دوور و درێژ و نالەبار و زەرەرمەندە چی بووە بۆ بزاڤی مافخوازی كوردی ڕۆژهەڵات بەگشتی وحێزبەكانی ڕۆژهەڵات بەتایبەتی چونكە بەدەیان كۆڕ و كۆبوونەوەو سیمینار و كونفرانس و وتار ...لەم بوارە كراوەو نووسراوەتەوە.لەلایەكی دیكەش هەم هێزە سیایسەكانی ڕۆژهەڵاتی كوردستان و هەم خەڵكی كورد نامۆ نین لەگەڵ سیاسەتەكانی ناوخۆیی و دەرەكی و پیلانەكانی كۆماری ئیسلامی بۆ ورد كردن و لەبار بردن و تواندنەوەی هەنگاو بەهەنگاوی خەبات و تێكۆشانی نەتەوەیی كوردی ڕۆژهەڵات .

لێرەدا ئەمەوێت بە تایبەت تیشك بخەمە سەر چەمك و ڕەهەندێك كە لەچاو باقی هۆكار و چەمكەكانی دیكە و لە خەسارناسی بزۆتنەوەی سیاسی – نەتەوەیی كورد لە ڕۆژهەڵات كەمتر خراوەتە بەرباس و لێكۆڵین و ئەگەریش كاری لەسەر كرا بێت ڕەنگە بەم شێوەیە یاخود لەم ڕوانگەیە كە مەبەستی ئەم وتارەیە باسی لێ نەكرابێت و ئەویش " ڕۆڵی تاكی لۆمپەنی سیاسی و مەدەنی ڕۆژهەڵاتی كوردستان و ئەوانەی لە ژێرناوی ڕووناكبیر و پسپۆڕی كورد لە ڕۆژهەڵات لە بوارە جیاوازەكان و بە ناوی سیاسەتمەدار و چالاكی سەربەخۆ و بێلایەن دەستێوەردانی ئۆپۆرتونیستی و ڕڤیزیونیستی دەكەنە ناو تێكوشانی ڕاستەقینەی بزاوتی كوردی ڕۆژهەڵات و بە ئامانج و مەبەستی مەرامدار بێت یاكۆ لە ڕووی نەزانی تا ئێستا زەربەی گەورەیان داوە بە هەیكەلی خەباتی كوردی ڕۆژهەڵات و لە دروست بوونی دوبەرەكی و چەندبەرەكی و لەتبوونی حێزبە سیاسی و ڕەسەنەكانی ڕۆژهەڵاتی كوردستان وەكۆ " كۆمەڵە و دیموكرات " و تەنانەت پەرت و بڵاوە كردنی ڕای گشتی خەڵكی ڕۆژهەڵاتی كوردستان لەناوخۆ و دەرەوەی وڵات ڕۆڵێكی كاریگەریان بینیوە ".

بە ڕاستی دەبێ هەموو تاكێكی كوردی ڕۆژهەڵاتی كوردستان كە بە شێوازی ڕاستەقینەو لەسەر ئەساسی تەرخانكردنی ژیان لە پێناو ڕزگاری نەتەوەكەی و پێشبردنی دۆزی ڕەوای نەتەوەیی پێناوەتە ڕێگای پڕ ئێش و ئازاری خەبات و بڕیاری بەردەوام بوونی هەتا كۆتایی ڕێگا داوە دەبێ ئەم پرسیارە لەخۆی بكات كە ئەم چین و گرۆپە بە ڕواڵەت ڕۆناكبیر و سیاسەتمەدار و چالاك و هتد ...كێن و نوێنەر و تەمسیلی كامە ڕێباز و سیاسەتن و وتار و كردار و بیرۆكەكانیان لە كۆتاییدا دەكەوێتە خزمەتی كام ناوەندی سیاسەت یاخود كامە بەرە ؟ دۆستن و یار ، یان نوێنەری شاراوەی نەیار و دوژمنن ؟ مەبەستی كەسییان هەیە و دەیانەوی بەم شێوازە بگەن بە ئامانجە شەخسییەكانیان یان لە ڕۆی نەزانی كەڵك لە پۆتانسییەڵ و میراتی نەتەوەیك و خوێنی گیانبەختكردووانی ڕێگای ئازادی گەلی كورد وەردەگرن و خەڵكی كورد و هێزە سیاسییەكان چی لەناوخۆی خۆیان (كە ڕەنگە ئەم چەشنە دەڵاڵانە تەنانەت وەك ئەندام و سەركردەش بن لەناو حێزبەكان ) چون دەبێ بەرەنگاریان ببنەوەو چۆن لێیان نزیك بن ؟
ئەم بابەتە روانگەی نووسەرەکەیەتی و رۆژهەڵات نیوز لە ناوەڕۆکی بەرپرسیار نییە.
197 جار خوێندراوه‌ته‌وه‌