رووسیا و ئێران هاوپەیمانییەکی ستراتیژیان لەنێوان خۆیان واژۆکرد و، هەردوولا ڤیلادیمیر پۆتن و مەسعوود پزیشکیان دەڵێن، لەبواری سیاسی، ئابووری، هەواڵگری و سەربازی یارمەتی یەکتر دەدەن. تاران و مۆسکۆ دوای ئەو هەموو مێژووە ئاڵۆزو بێ متمانەییەی لەنێوانیاندا هەبوو، هاوپەیمانییەکی نووسراوی ستراتیژیکی لەنێوان خۆیان واژۆ بکەن. مەسعوود پزیشکیان سەرۆککۆماری ئێران سەردانی مۆسکۆی کرد و، لە ئەنجامی سەردانە دوو رۆژییەکەیدا و لەکۆتاییدا هاوپەیمانییەکی نووسراوی ستراتیژیان لەگەڵ ڤیلادیمیر پۆتن سەرۆککۆماری رووسیا واژۆ کرد. نوسخەیەکی فارسی دەقی راگەیاندراوەکە دەستی رۆژهەڵات نیوز گەیشتووەو وردەکاری رێککەوتنەکەی تێکدایە. ئەو دەقەی لەلایەن پۆتن و پزیشکیان لەژێر ناوی پەیمانی ستراتیژی واژۆ کراوە، لە ٤٧ مادە پێکهاتووەو بواری سیاسی، ئابووری، هەواڵگری و سەربازی لەخۆی دەگرێت. بەپێی پەیمانەکەی ئەمرۆ واژۆ کراوە، هەردوولا پەیمانەکانی رابردووی نێوانیان دەپارێزن. گرنگترین پەیمانەکانی نێوانیان پەیمانی یەکێتی سۆڤییەت (شۆرەوی) و ئێران هی ساڵی ١٩٢١ و پەیمانی کەشتیوانی و بازرگانی نێوانیان هی ساڵی ١٩٤١ و پەیمانی هاوکاری نێوانیان هی ساڵی ٢٠٠١ بووە. هیچ یەک لەو پەیمانانەی کە پێشتر لەنێوان هەردوولا واژۆ کراون، دەستەواژەی پەیمانی ستراتیژی لەسەر نەبووە، بەڵام ئەوەی پۆتن و پزیشکیان واژۆیان کردووە، پەیمانی ستراتیژییەو ٤٧ مادەی نوێ دەخاتە سەر پەیمانەکانی پێشووی نێوان مۆسکۆ و تاران. ڤیلادیمیر پۆتن دوای واژۆکردنی پەیمانەکە رایگەیاند کە ئێران و رووسیا بە هێزەوە لەبەرامبەر گوشارە دەرەکییەکان دەوەستنەوە. بەگوتەی ئەو هەردوو وڵات بنەماکانی سەروەری خۆیان دەپارێزن و لەبەرامبەر هەر جۆرە دەستێوەردانێکی دەرەکیدا دەوەستنەوە. هەواڵدەری فەرانسە، لەسەر زاری ڤیلادیمیر پۆتن باسیشی لەوە کردووە کە پەیمانەکە دەرفەتی ئەوە بەهەردوولا دەدات کە پەلە لە جێبەجێکردنی سەرجەم پەیمانەکان و پەرەپێدانی زیاتر بە هاوکارییەکان بدات. پۆتن ئەوەشی گوتووە کە ئە پەیمانەی لەگەڵ ئێران واژۆیان کردووە، لەقازانجی هەردوولا و تەنانەت هەموو ناوچەی ئۆراسیا دایە. مەسعوود پزیشکیان سەرۆککۆماری ئێرانیش دوای واژۆکردنی پەیمانەکە دوای گەیاندنی پەیامی عەلی خامنەیی رێبەری ئێران بە سەرۆککۆماری رووسیا، رایگەیاند کە رووسیا وڵاتێکی گرنگی جیهان و هاوکات دراوسێکی ستراتیژی ئێرانەو لەهەموو بوارێکدا دەتوانن پەرە بە پەیوەندییەکانیان بدەن. ئەو پەیمانە ستراتیژییەی نێوان مۆسکۆ و تاران لەسەروبەندی سوێندخواردنی یاسایی دۆناڵد ترەمپ سەرۆککۆماری هەڵبژێردراوی ئەمریکا واژۆ کرا. هەردوولا بە پارێزەوە چاوەرێی چوونی ترەمپ بۆ کۆشکی سپین. ترەمپ پێشوەختە گوتوویەتی کە بەپەلە لەگەڵ پۆتن کۆدەبێتەوەو کۆتایی بە شەڕی ئۆکرانیا دەهێنێت. سەبارەت بە ئێرانیش کابینەکەی دۆناڵد ترەمپ باس لە گوشاری زۆرتر بۆ سەر ئێران دەکەن، لەگەڵ ئەوەش لایەنی ئێرانی و بەتایبەت مەسعود پزیشکیان راستەوخۆو ناراستەوخۆ پەیمانی ئەوە دەدەن کە ئامادەن لەسەر هەموو بوارەکان لەگەڵ ئەمریکا گفتوگۆ بکەن. سەرۆککۆماری ئێران هەفتەی رابردوو لە چاوپێکەوتنێکدا بەکەناڵی ئێن بی سی ئەمریکا ئامادەیی وڵاتەکەی بۆ گفتوگۆکردن دەڕبری. لەگەڵ ئەوەش تاران و مۆسکۆ پێش هاتنەسەرکاری دۆناڵد ترەمپ پەیمانێکیان واژۆکرد، کە بەشی زۆری خاڵەکانی باس لە پەرەپێدانی پەیوەندییە ئابوورییەکانی نێوانیان دەکات.
.jpg)
