سەر لەبەیانی ئەمرۆ شەممە ٢٩ی بەفرانبار چەکدارێک لەناو بینای دیوانی باڵای ئێران، دوو قازی بەناوبانگی دادگای باڵای کوشت و، بکوژیش لەشوێنی رووداوەکە خۆی کوشت. محەمەد مۆقیسە و عەلی رازینی ئەو دوو قازییە باڵایەی کۆماری ئیسلامی ئێرانن کە سەر لەبەیانی ئەمرۆ کوژران و قازییەکی دیکەش بەناوی نەیری بڕیندارەو دۆخی تەندروستی ناجێگیرەو لەژێر چاودێری چڕی پزیشکی دایە. هەندێک سەرچاوە باس لەوە دەکەن کە بکوژ چایچیی دیوانی باڵای ئێران بووەو لەژووری ئەو قازیانە تەقەی لێکردوون و کوشتوونی. راگەیاندنەکانی ئێران باس لەوە دەکەن، بکوژ هیچ دۆسییەکی شەخسی لە دیوان نەبووە، کەواتا ئەنگێزەی شەخسی نەبووە. ئەو دوو قازییەی کە ئەمرۆ کوژراون کێن؟ عەلی رازینی و محەمەد مەقیسە دوو قازی پڵە باڵای دیوانی باڵای ئێران بوونەو زۆرتر کاریان لەسەر دۆسییەی ئەمنییەتی، هەواڵگری، تیرۆر و بەگشتی دۆسییەی دژبەرانی کۆماری ئیسلامی ئێران کردووە. عەلی رازینی ساڵی ١٣٥٧ بەرێوەبەری قوتابخانەی حەقانی بوو. قوتابخانەی حەقانی ساڵی ١٣٣٠ لە قۆم دامەزرابوو، نوێنەرایەتی رەوتێکی تووندڕەوی مەزهەبی دەکرد و کاریگەرییەکی زۆریان لەسەر شۆرشی گەڵانی ئێران هەبوو، ئاخوند و قوتابیانی قوتابخانەی حەقانی دواتر بوون بە بەرپرسی باڵای سیاسی و ئەمنییەتی و قەزایی کۆماری ئیسلامی ئێران. عەلی رازینی ساڵی ١٣٥٩ چووە ناو دەسەڵاتی دادوەری ئێران (قوە قزاییە). رازینی لەساڵی ١٣٦٠ چووە ناو دادگای ئینقلابی تاران و دواتر کرایە بەرپرسی دۆسییەی بەرەنگاربوونەوەی موجاهیدینی خەلق لە پارێزگای خوراسان. هەر ئەو کات حوکمی سەدان لەسێدارەدانی دژبەرانی کۆماری ئیسلامی ئێرانی واژۆ کرد. رازینی لەساڵی ١٣٦٣ جێگەی ئەسەدوڵڵا لاجوەردی داواکاری گشتی تارانی گرتەوەو دواتر وەکوو بەرپرسی ناوەندی دادوەری هێزە چەکدارەکانی ئێرانی دیاریکرا. عەلی رازینی ساڵی ١٣٦٦ لەلایەن روحوڵڵا خومەینی وەکوو حاکم شەرعی دادگای روحانییەت و ساڵی ١٣٦٧یش وەکوو بەرپرسی دۆسییەی سەرپێچیکارەکانی شەڕ دەستنیشان کرا. محەمەد مۆقیسە یەکێکی دیکە لە کوژراوەکانی ئەمرۆی دادگای باڵای ئێرانیش یەکێک لە قازییە تووندڕەوەکانی ئێران بوو. ئەویش هەر دۆسییەی سیاسی و ئەمنییەتییەکانی لەبەردەستدا بوو. مۆقیسە لە دەیەی ١٣٦٠ کە سەدان بەندکراو بەبێ دادگایی لەسێدارەدران، ماوەیەک دادیاری زیندانی ئەوین بووە. محەمەد مۆقیسە لە چوارچێوەی کوشتاری بەندکراوانی سیاسی ١٣٦٧ رۆڵی سەرەکی لە دەرکردنی حوکمەکانی زیندانی گەوهەردەشت هەبووە. شایەتحاڵەکان دەڵێن مۆقیسە، ئەوکات بەناوی خوازراوی ناسریان لە زیندانی گەوهەردەشت کاری کردووە. محەمەد مۆقیسە لە چەند ساڵی رابردوودا بەرپرسی لقی ٢٨ی دادگای گشتی و ئینقلابی تاران بووەو حوکمی لەسێدارەدان و زیندانی هەتاهەتایی بۆ سەدان بەندکراوی سیاسیی دەرکردووەو لەنێویشیاندا دەیان بەندکراوی سیاسی کورد لەلایەن مۆقیسە سزایی لەسێدارەدانیان بەسەردا سەپێندراوە، یان حوکمەکانیان لەدادگای پێداچوونەوەدا لەلایەن مۆقیسە پەسەند کراوە.
.jpg)
