سەرجەم حیزبە سیاسییەکانی رۆژهەڵاتی کوردستان و ژمارەیەکی کەسایەتی سەربەخۆ بەدەستپێشخەری کۆنگرەی نەتەوەیی کوردستان (کەنەکە) لە شاری بروکسێل کۆبوونەوە. سەرچاوەیەکی بەشدار لە کۆبوونەوەکە بە رۆژهەڵات نیوزی راگەیاند، کۆبوونەوەکە لەسەر داوای کەنەکە بووە، بۆ ئەوەی ئامادەکاری بۆ بەستنی کۆنفرانسێکی تایبەت بە رۆژهەڵاتی کوردستان بکەن. کۆبوونەوە پێشتر لە سەد ساڵەی پەیمانی لۆزان بڕیاری لەسەر درابوو، بۆ ئەوەی کەنەکە کۆنفرانسێکی تایبەت بە رۆژهەڵاتی کوردستان بەرێوەببات. لەو کۆبوونەوەیەدا لێژنەیەک بۆ ئامادەکاری ئەو کۆنفرانسە پێکهاتووەو هەر حیزبەو نوێنەری خۆی بۆ ئەو لێژنەیە دیاری کردووە. بەپێی سەرچاوەکەی رۆژهەڵات نیوز، قسە لەسەر ئەوە کراوە کە پێش نەورۆز ئامادەکارییەکان تەواو بن و کۆنفرانسەکەش پێش سەری ساڵی کوردی بەرێوەبچێت. لە کۆبوونەوەکەی رۆژی شەممەی لایەنە سیاسییەکانی رۆژهەڵاتی کوردستاندا ئەو حیزبانە بەشداربوون: حیزبی دیموکراتی کوردستانی ئێران، کۆمەڵەی شۆرشگێری زەحمەتکێشانی کوردستانی ئێران، کۆمەڵەی زەحمەتکێشانی کوردستان، پارتی ژیانی ئازادی کوردستان پژاک، کۆمەڵە رێکخراوی کوردستانی حیزبی کۆمۆنیستی ئێران، پارتی ئازادی کوردستان پاک و سازمانی خەباتی کوردستانی ئێران لەگەڵ ژمارەیەک کەسایەتی سەربەخۆی دیکە.
