کچێکی تەمەن حەوت ساڵان بە ناوی نیان بەهۆی ئەشکەنجەدان لەلایەن زڕدایک و پیاوێکی دیکە گیان لەدەست دەدات و بکوژرانیش دەستبەسەر کراون. بەپێی زانیارییەکانی رۆژهەڵات نیوز، ئێوارەی رۆژی پێنجشەممە منداڵێکی تەمەن ٧ ساڵان لەدۆخێکی ناجێگیری تەندروستی دەگاتە ئۆرژانس (فریاکەوتن)ی شاری بۆکان. دوای تاقیکاری لەسەر کچەکە دەردەکەوێت کە تووشی خوێنبەربوون بەهۆی دەسترێژیکردن و ئەشکەنجەدان و ئاوسانی رووخساری بووە. لەو کاتەدا پیاوێک لەوێ دەبێ و کە دۆخی کچەکەی دەبینێت، هەوڵ دەدات بەبێدەنگی نەخۆشخانە بەجێبهێڵێت، بەڵام رێگری لێدەکرێت و هەر لەوێ دەستبەسەر دەکرێت. رۆژی هەینیش زڕدایکی کچەکەش دەستبەسەر دەکرێت و دوای لێکۆڵینەوەکان دەردەکەوێت کە کچەکە کە ناوی نیان چەڵیانیە، لەلایەن زڕدایک و پیاوێک کە هاورێی زڕدایکی نیان بووە ئەشکەنجە دراوەو تووشی خوێنەربوون دەبێت. نیان لەکاتێکدا لەهۆش خۆی چوبوو، رەوانەی نەخۆشخانەیەکی ورمێ دەکرێت و، رۆژی هەینی لەوێ گیان لەدەست دەدات. باوکی نیان بەهۆی سکالای هاوسەری پێشووی لە بەندیخانەدایە و، بەپێچەوانەی ئەوەی لە میدیاکان باس دەکرێت، هیچ رۆڵێکی لەو تاوانەدا نەبووەو تەنانەت تاکوو ئێستاش هەر لە زیندانە. تاوانەکە لە لایەن زڕدایکی نیان و پیاوێکی هاورێی زڕدایکەکەی کراوەو هەردووکیشیان ئێستا دەستبەسەر کراون.
