سەر لەبەیانی رۆژی ٣ی بەفرانبار ئەو رۆژەی مانگرتنی گشتی راگەیاندرابوو، میدیاکانی سەر بە سوپای پاسداران رایانگەیاند، کە جێبەجێکردنی حوکمی لەسێدارەدانی پەخشان عەزیزی راگیراوە. هەر زوو دوای سێ کاتژمێر هەمان میدیاکان رەتیانکردەوە کە جێبەجێکردنی سزاکە راگیرابێت، لە ڕوونکردنەوەکەیاندا هاتبوو، کە خراپ تێگەیشتن روویداوەو جێبەجێکردنی سزاکە رانەگیراوە. ئەو دوو هەواڵە هەوڵێک بوو، بۆ ئەوەی خەڵک لە داخستنی دوکان و بازارەکان دوودڵ بکەن. دوای ئەوەش لەدوا نیوەرۆی هەمان رۆژدا ئەمیر رەئیسیان پارێزەری پەخشان عەزیزی لە ستۆرییەکی ئینستاگرامیدا هەواڵەکەی بەشێوەیەکی دیکە راگەیاند، رەئیسیان گوتی چونکە داوای پێداچوونەوەی حوکمەکەیان کردووە، رەزامەندی لەسەر راگرتنی کاتی جێبەجێکردنی سزای لەسێدارەدانی پەخشان دراوە. بۆ روونکردنەوەی ئەو مادە یاساییەو زانیارییەکان عوسمان موزەییەن پارێزەر بە رۆژهەڵات نیوزی راگەیاند، دوای ئەوەی دیوانی باڵای ئێران حوکمەکەیان پەسەند کرد، پارێزەرەکانی پەخشان داوای ئیعادەی دادرەسیان کردووە، هەر بۆیە دیوانی عالی لەسەر بنەمای داوای پارێزەرەکان تەنیا جێبەجێکردنی حوکمەکەیان بۆ ماوەیەکی کاتی راگرتووە، هەتا دادگا پێداچوونەوەی خۆی بکات. بەرای موزەیەن دیوانی عالی ئێران هیچ بڕیارێکی نەداوەو ئەوە تەنیا راگرتنی جێبەجێگرتنی سزاکەیە، نەک پێداچوونەوە یان هەڵوەشاندنەوە تەنانەت هەڵپەساردنیش نیە. کەمپەینی پشتیوانیکردن لە پەخشان عەزیزی و وریشە مورادی لەئاستی کوردستان و دەرەوەی وڵات بەردەوامە. لەدوایین کارانەوەشدا یەکێتی ئوروپاش داوای هەڵوەشاندنەوەی ئەو سزایەی لە کۆماری ئیسلامی ئێران کردووە.
