دۆناڵد ترەمپ، سەرۆککۆماری ویلایەتە یەکگرتووەکانی ئەمریکا، لە گفتوگۆیەکدا لەگەڵ رۆژنامەنووسان رایگەیاند هیوادارە کە پرسی ئێران بەبێ ئەوەی پێویستی بە هێرشی ئیسرائیل هەبێ، چارەسەر بکرێت. دۆناڵد ترەمپ، ئێوارەی رۆژی پێنجشەممە ٤ی بەفرانبار لەگەڵ واژۆکردنی ژمارەیەک بڕیاری جێبەجێکاری دیکە وەڵامی پرسیاری رۆژنامەنووسانی دایەوەو رایگەیاند، هیوادارە کە پێویست بەوە نەکات ئیسرائیل هێرش بکاتە سەر ئێران و پرسی ئەتۆمی ئێران بەگفتوگۆکردن چارەسەر بکرێت. رۆژنامەنووسێک لەدۆناڵد ترەمپ دەپرسێ کە ئایا ئیسرائیل هێرش بۆ سەر بنکە ئەتۆمییەکان دەکات، گوتی:" بێگومان وەڵامی ئەو پرسیارە نادەمەوە، دەبێ بزانین چی روودەدات؟" ترەمپ گوتیشی زۆر باش دەبێ کە پێویست بە هێرشی ئیسرائیل بۆ سەر ئێران نەکات و پرسەکە چارەسەر بێت. سەرۆککۆماری ئەمریکا لەهەمان رۆژدا بە کەناڵی فاکس نیوزیشی وتبوو، کە بەهەموو شێوەیەک رێگە نادەین ئێران دەستی بە چەکی ئەتۆم رابگات. رۆژی پێشتر وەزارەتی دەرەوەی ئەمریکا ستیڤ ویتکاف بازرگانی ناوداری ئەمریکای وەکوو بەرپرسی تایبەتی کۆشکی سپی بۆ کاروباری ئێران دیاریکرد. ماڵپەری ئەکسیۆسی ئەمریکاش ئاشکرایکردووە کە ترەمپ ویتکاف وەکوو بەپرسی دیپلۆماسی لەگەڵ ئێران دیاری دەکات. ویتکاف یەکێک لە کاریگەرترین کەسایەتییەکانی بەئەنجام گەیاندنی ئاگربەست لە غەززە بووەو هاوکات هیوای خواستووە بتوانێ لەرێگەی دیپلۆماسی پرسی ئەتۆمی لەگەڵ ئێرانیش چارەسەر بکات.
.jpg)
