ئەمرۆ سێشەممە ٩ی بەفرانبار تەرمی دکتور هێرش قادری نووسەرو توێژەری دیاری رۆژهەڵاتی کوردستان لە شاری بێرلین لە ئاڵمان بەخاکسپێدرا. زیاتر لە دوو هەفتە بەر لەئێستا هەواڵی کۆچی دوایی دکتور هێرش بڵاوکرایەوەو هەواڵەکە بەمشێوەیە باسکرا، کە بەهۆی رووداوی هاتووچۆ گیانی لەدەستداوە. بەڵام بەپێی بەدواداچوونەکانی رۆژهەڵات نیوز، ئەوە یەکلایی بووەتەوە کە دکتور هێرش بەهۆی رووداوی هاتووچۆ گیانی لەدەست نەداوە، چوونکە ئەو کەسانەی لەنزیکەوە ئاگادارن و بەدواداچوونیان بۆ پرسەکە کردووە. بەڵام پرسیار ئەوەیە کە دکتور هێرش چۆن گیانی لەدەستداوە، تیرۆرکراوە یان کوژراوە. بەپێی بەدواداچوونەکانی رۆژهەڵات نیوز، راپۆرتی پۆلیس لەسەر ئەو رووداوە ئامادەیە، بەڵام بەپێی یاسا دەبێ بە کەسە یەکەمەکانی بنەماڵەی کوژراو یان پارێزەرێکی فەرمی کەیسەکە بدرێت. پارێزەرێک بۆ کەیسی دکتور هێرش قادری راسپێدراوە، بڕیارە لە چەند رۆژی داهاتوودا راپۆرتی پۆلیس لەسەر چۆنییەتی گیان لەدەستدانی ئەو نووسەرو توێژەرە کوردە بە پارێزەرەکە بدرێت. دکتور هێرش (زەکەریا) قادری یەکێک لە توێژەرە هەرە جیدییەکانی کوردستان بوو، کە لەبواری مێژوو و فەڵسەفە و شوناسی کوردی و ئەویتری داگیرکەری کوردستان کاری دەکرد. دکتور هێرش بڕوانامەی دوکتورای لە زانستە سیاسییەکان لە زانکۆی علوم تەحقیقاتی تاران بەدەست دەهێنێت، ماستەری لە زانکۆی عەلامەی تەباتەبایی تاران وەرگرتووەو دواتریش وەکوو ماموستا لە زانکۆی ئازادی کرماشان دەستبەکار دەبێت. دکتور هێرش لەدایکبووی شاری پاوەی رۆژهەڵاتی کوردستان بوو، هەر لەسەردەمی خوێندکارییەوە بەوتارو نووسینی رەخنەیی لە ژورناڵەکان کەوتبووە ژێر گوشاری دامودەزگا ئەمنیەتییەکانی کۆماری ئیسلامی ئێران. لەسەر پۆلەکان بە بەردەوامی باسی لە مێژوو و شوناسی جیاوازی کوردی لە هی ئێرانییەکان دەکرد، هەربۆیە بەردەوام لەژێر چاودێری دابوو. دکتور هێرش بەهۆی نووسینی وتارێکی رەخنەیی لەسەر ئیسلام بەناوی "پەیوەندی ئیسلام و عەسەبییەت و ناسیۆنالیسمی کورد" لە گۆڤاری زرێبار دەکەوێتە ژێر هەڕەشەو بەناچاری روو لە باشووری کوردستان دەکات. دوکتور هێرش (زەکەریا) قادری، ئاکادمیسیەنی گەنجی کورد، پاش ململانێیەکی زۆر لەگەڵ ڕەوت و هزری پان ئێرانیزم و پان فارسیزم و دوای ئەوەی کە بە هۆی هەڵگرتنی ئاڵای هزرێکی نوێ لە شوناسی کوردی، تووشی کێشە و ئاڵۆزییەکی زۆر و درێژخایەن بوو، لە ئەنجامدا بەیارمەتیی ناوەندی لێکۆڵینەوەی ستراتژیکیی حدکا، کتێبەکەی (“عەقڵی سیاسی ئێران و ناسنامە خوازیی کورد”)ی چاپ و بڵاو کردەوە، کتێبێک کە ڕوونکەرەوەی بەشێکی زۆر لێڵ لە مێژووی کوردە کە بە دەست داگیرکەرانی شێوێندراوە. ئەو کتێبە بۆ یەکەم جار بە گوتەی نووسەر، چوونە ناو داڵانێکی تاریکە کە گەلێک ڕەهەندی شێوێندراو و لاڕێ کراوی ڕوون کردۆتەوە، کەواتە ئەو پەرتووکە، شوناسی کوردە و گرنگیەکی یەکجار زۆری هەیە و دەکرێ بکرێ بە دەستپێکێکی نوێ بۆ لێکۆڵینەوە و شیکاری مێژوویی نوێ.
