ئەدهەم بارزانی لە چەند شاری رۆژهەڵاتی کوردستان لەگەڵ چەکدارە کوردەکانی سەر بەرژێم کۆبووەتەوەو هەوڵی راکێشانیان بۆ ناو حیزبوڵڵای کوردستان دەدات کە لەباشووری کوردستان دایمەزراندووە. سەرچاوەیەکی ئاگادار لە شاری مەهاباد بە رۆژهەڵات نیوزی راگەیاند، کە ئەدهەم بارزانی لە هەفتەی رابردوودا لە گەڵ ژمارەیەک چەکداری کوردی سەر بەرژێم کۆبووەتەوەو داوای لێکردوون کە هاوکاری حیزبوڵڵای کوردستان بکەن، کە لە هەرێمی کوردستان و بەپشتیوانی سوپای پاسداران دایمەزراندووە. بەپێی زانیارییەکانی رۆژهەڵات نیوز، ئەدهەم بارزانی لە دوو مانگی رابردوودا بەهەمان مەبەست لەگەڵ ژمارەیەک چەکداری کوردی رژێمی ئێران لە شارەکانی مەریوان و شنۆش کۆبووەتەوە. لەهەموو کۆبوونەوەکانیش ئەدهەم بارزانی پێی راگەیاندوون کە دەتوانن ئەندام و چەکدارەکانی حیزبووڵڵای کوردستان لەهەردوو دیوی باشوور و رۆژهەڵاتی کوردستان تێکەڵ بکەن و هێزێکی هاوبەش پێکبهێنن. حیزبوڵڵای کورد ساڵی ١٩٨٣ لە رۆژهەڵاتی کوردستان لەلایەن شێخ محەمەد خالید بارزانی و لەسەر داوای ئەنجوومەنی باڵای شۆرشی ئیسلامی لە عێراق دروستکرا. کۆماری ئیسلامی ئێران پشتیوانییەکی تەواوی لەو رێکخراوەیە کرد. پاشان لەساڵی ١٩٨٨ ئەدهەم بارزانی لەهەناوی حیزبوڵڵای کورد و بەئاگاداری قەرارگای رەمەزان حیزبوڵڵای شۆڕشگێری کوردی دامەزراند، رۆژنامەیەکیشیان بەناوی رووناکیی بڵاودەکردەوە. دوای رووداوەکای حەوتی ئۆکتۆبەر و، هێرشەکانی ئیسرائیل و ئەمریکا بۆ سەر پرۆکسییەکانی ئێران لەناوچەو لاوازبوونی حەماس و حیزبوڵڵای لوبنان، جارێکیتر دەنگۆی چاڵاکبوونەوەی رێکخراوەکە بەناوی حیزبوڵڵا لە هەرێمی کوردستان زیادیکرد و، دواتر ئەدهەم بارزانی هەواڵەکەی پشتراست کردەوە.
.jpg)
