حیزبی دیموکراتی کوردستانی ئێران رایگەیاند کە لەدووەم کۆبوونەوەی کۆمیتەی ناوەندیی هەڵبژێدراوی کۆنگرەی حەڤدەهەمی خۆیدا ئەندامانی دەستەی کارگێری هەڵبژاردووە. ئەگەرچی لەناو راگەیاندراوەکەیدا حدکادا زانیاری لەسەر هەڵبژێدراوان بۆ دەستەی کارگێری باس نەکراوە، بەڵام بەپێی زانیارییەکانی رۆژهەڵات نیوز لەو کۆبوونەوەیەدا دەبووا ٦ کەس بۆ دەستەی کارگێری هەڵبژێدرێن، کە ٥ کەسیان هەڵبژێدراون کە بریتین لە مستەفا مەولودی، محەمەد نەزیف قادری، کاوە بەهرامی، عومەر باڵەکی و حەسەن قادرزادە. بەڵام کەریم پەرویزی کە لەو لیستەی مستەفا هیجری سکرتێری گشتی حدکا دا بووەو خراوەتە بەردەم کۆمیتەیی ناوەندی دەنگی نەهێناوەتەوەو هەڵبژاردنی ئەو پۆستە بۆ کاتێکی دیکە دوا خراوە. جێگەی ئاماژەپێدانە لەیەکەم کۆبوونەوەی کۆمیتەی ناوەندیی هەڵبژێدراوی کۆنگرەی حەڤدەیەمی حیزبی دیموکراتی کوردستانی ئێران، مستەفا هیجری بە تێکرای دەنگ بە سکرتێری ئەو حیزبە هەڵبژێردرابوو. هاوکات سەبارەت بە خالید عەزیزی گوتەبێژی پێشووی حدکا و سکرتێری پێشووتری حدک، رۆژهەڵات نیوز لەسەر زاری سەرچاوەیەکی ئاگادار زانیویەتی کە خالید عەزیزی خۆی بۆ ئەندامی دەستەی کارگێری کاندید نەکردووە، چوونکە بڕیاربوو کە عەزیزی بکرێتە جێگری سکرتێر، بەڵام بەپێی بڕیاری سکرتێری گشتی جێگری سکرتێر دەبێ بە بەردەوامی لەکوردستان بێت، هەربۆیە خالید عەزیزی خۆی بۆ دەستەی کارگێری کاندید نەکردووە. هاوکات بڕیاریشە لەداهاتووییەکی نزیکدا جێگری سکرتێریش دیاری بکرێت، کە ناوی مستەفا مەولودی و محەمەد نەزیف قادری زۆرتر لەوانیتر بۆ ئەو پۆستە باس دەکرێت.
