زەینەب جەلالیان بەندکراوی سیاسی کورد، لە ماوەی ٦ هەزارو ٢٠٩ رۆژ کە لە زیندانی رژێمی ئێران دایە، لەگەڵ ئەوەی ساڵانێکە دۆخی تەندرووستی ناجێگیرە، بەڵام بۆ یەک رۆژیش رێگەی پێنەدراوە، سەردانی بنەماڵەکەی بکات. ئەمرۆ سێشەممە ٧ی رەشەممە ١٧ ساڵ لە دەستبەسەرکرانی زەینەب جەلالیان بەندکراوی سیاسی کورد تێدەپەرێت. زەینەب خەڵکی شاری ماکۆی رۆژهەڵاتی کوردستانەو ١٧ ساڵ لەمەوبەر بەتۆمەتی ئەندامبوون لە پارتی ژیانی ئازادی کوردستان پژاک سزای زیندانی هەتاهەتایی بەسەردا سەپێندرا. ئەمرۆ لە کاتێکدا زەینەب جەلالیان دەچێتە نێو هەژدەیەمین ساڵ لە بەندکرانی، بارودۆخی تەندرووستی و جەستەیی ناجێگیرەو مافی دەستراگەیشتن بە دەرمان و پێراگەیشتنی پزیشکی پێ نادەن. بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، زەینەب جەلالیان، بەندکراوی سیاسیی تەمەن ٤٢ ساڵی خەڵکی گوندی دەیم قشلاقی سەر بە شاری ماکۆ و بەندکراوی بەندیخانەی ناوەندیی یەزد، سەرەڕای نەخۆشیی ناخونەی چاو، هەوکردنی دەم، تەنگەنەفەسی، کێشەی گورچیلە و هەرس و لەحاڵێکدا کە مەترسی جددیی لەدەستدانی بینایی چاوی لەئارادایە بە دژایەتیی بەرپرسانی بەندیخانە لە مافی دەستڕاگەیشتن بە دەرمان و پێڕاگەیشتنی پزیشکی بێبەش کراوە. جەلالیان لەو ١٧ ساڵەدا بۆ یەک رۆژیش رێگەی پێنەدراوە کە سەردانی بنەماڵەکەی بکات و هاوکات ئەوە ٥ مانگە رێگە بە بنەماڵەکەشی نادەن کە لەزیندان سەردانی بکەن.
