وەزیری دەرەوەی ئیسرائیل دەڵێ، رەنگە ناچار بن، هێرشی سەربازی بۆ سەر ئێران بکەن، بۆ ئەوەی رێگری لە دەستراگەیشتنی ئەو وڵاتە بە چەکی ئەتۆم بکەن. رۆژی چوارشەممە ٨ی رەشەممە گیدئۆن ساعر وەزیری دەرەوەی ئیسرائیل بە ماڵپەری پۆلۆتیکۆی ئەمریکای راگەیاند، ئەوان هیوایەکی ئەوتۆیان نیە کە بتوانن لەرێگەی دیپلۆماسی ئێران وەڵامدەر بکەن. بەگوتەی ساعر، ئیسرائیل بۆ گوشارخستنە سەر ئێران، چاوی لە یارمەتییەکانی دۆناڵد ترەمپ سەرۆککۆماری ئەمریکایە. وەزیری دەرەوەی ئیسرائیل ئاماژەی بە زیادکردنی رێژەی یۆرانیۆمی پیتێندراو لە ئێران دا و، ئاشکراشیکرد کە ئەو رێژە یۆرانیۆمە بەشی دوو یان سێ بۆمبی ئەتۆم دەکات. گیدئۆن ساعر دەڵێ ئەگەر نەتوانین رێگری لە پرۆژە ئەتۆمییەکانی ئێران بکەین، نەک ئاسایشی ئیسرائیل بەڵکوو ئاسایشی رۆژهەڵاتی ناوەراست دەکەوێتە مەترسییەکی گەورەوە. دۆناڵد ترەمپ سەرۆککۆماری ئەمریکا لەگەڵ گەرانەوەی بۆ کۆشکی سپی، سیاسەتی گەراندنەوەی ئەوپەڕی گوشار بۆ سەر ئێرانی راگەیاند، لەگەڵ ئەوەش بەردەوام باسی لەوە کردووە کە ئامادەیە لەسەر رێککەوتنێکی نوێ لەگەڵ ئێران گفتوگۆ بکات. ترەمپ ئەگەرچی خۆی راستەوخۆ تاکوو ئێستا هەڕەشەی هێرشی سەربازی بۆ سەر بنکە ئەتۆمییەکانی ئێرانی نەکردووە، بەڵام بە رۆژنامەی نیۆیۆرک پۆستی ئەمریکای وتبوو کە ئەگەر رێککەوتنێک لەگەڵ ئێران بێتە ئاراوە، ئیسرائیل هێرشی سەربازی بۆ سەر ئێران ناکات.
