لەکۆبوونەوەی ئەنجوومەنی ئاسایشی رێکخراوی نەتەوە یەکگرتووەکان، ئەمریکا داوای یەکدەنگی لەبەرامبەر سەرەرۆییەکانی ئێران و بەریتانیا هەڕەشەی گەراندنەوەی سەرجەم گەمارۆکانی بۆ سەر تاران کرد. ئێوارەی رۆژی چوارشەممە ٢٢ی رەشەممە ئەنجوومەنی ئاسایشی رێکخراوی نەتەوە یەکگرتووەکان دوور لەچاوی کامێراکان لەسەر قسەکردن لەسەر پرۆژە ئەتۆمییەکانی کۆماری ئیسلامی ئێران کۆبوونەوە. کۆبوونەوەکە دوای دوا راپۆرتی ئەژانسی نێودەوڵەتی وزەی ئەتۆم رێکخرا، ئەژانسەکە ئاشکرایکردووە کە رێژەی یۆرانیۆمی پیتێندراوی ئێران لە مانگی دیسەمبەر بەرێژەیەکی بەرچاو زیادیکردووەو ئەوەش نیگەرانییەکانی لەهەمبەر پرۆژە ئەتۆمییەکانی تاران زۆر کردووە. بەر لە دەستپێکی کۆبوونەوەی ئەنجوومەنی ئاسایش، جەیمز کاربووکی نوێنەری بەریتانیا لە رێکخراوی نەتەوە یەکگرتووەکان رایگەیاند کە ئەوان بۆ رێگریکردن لە دەستپێراگەیشتنی ئێران بە چەکی ئەتۆم هەموو کارێک دەکەن و ئەگەر پێویست بکات بەپەلە میکانیزمی سنەب بەک بۆ گەراندنەوەی سەرجەم گەمارۆکانی سەر ئەو وڵاتە کارا دەکەن. هاوکات دوای تەواوبوونی کۆبوونەوەکەش نوێنەری ئەمریکا لە ئەنجوومەنی ئاسایش لە راگەیاندراوێکدا هۆشداری بە تاران دا و داوای لە وڵاتانی جیهان کرد لەبەرامبەر هەڵسوکەوتە سەرەرۆییەکانی ئێران یەکدەنگ بن. بەگوتەی نوێنەری ئەمریکا، ئێران تاکە وڵاتە کە بەبێ ئەوەی چەکی ئەتۆمی هەبێ، رێژەی پیتاندنی یۆرانیۆمی بۆ ئاستێکی مەترسیدار بەرزکردووەتەوە. هەر بۆیە دەبێ بەپەلە رێگری لێبکرێت. هەفتەی رابردووش بەریتانیا، فەرەنسا و ئاڵمان لە راگەیاندراوێکی هاوبەشدا پابەندنەبوونی تاران بە رێککەوتنەکانیان دووپاتکردەوەو رایانگەیاند کە ئامادەن پرۆسەی گەراندنەوەی سەرجەم گەمارۆکانی رێکخراوی نەتەوە یەکگرتووەکان بۆ سەر ئێران دەستپێبکەن. لەبەرامبەردا عەلی خامنەیی رێبەری کۆماری ئیسلامی ئێران رۆژی چوارشەممە رایگەیاند، کە ئەوان ئامادە نین لەگەڵ ئەمریکا گفتوگۆ بکەن، چوونکە ئەمریکا مەبەستی تەنیا پرۆژە ئەتۆمییەکانی ئێران نیەو دەیەوێ داخوازی دیکەش بەسەر ئەواندا بسەپێنێت.
.jpg)
