راپۆرت: رۆژهەڵات نیوز لایەنە سیاسییەکانی رۆژهەڵاتی کوردستان ئەو دەنگۆیانە رەتدەکەنەوە کە گوایا هەوڵێک بۆ گفتوگۆکردنیان لەگەڵ رژێمی ئێران هەیە. لەگەڵ هاتنەدەری پەیامی عەبدوڵڵا ئۆجەلان رێبەری پارتی کرێکارانی کوردستان و دواتر رێککەوتنی مەزڵووم عەبدی و ئەحمەد شەرع بڵاوکرایەوە، ئەو دەنگۆیەش لەسوشیاڵ میدیا بڵاوکرایەوە کە هەوڵێک هەیە بۆ ئەوەی لایەنە سیاسییەکانی رۆژهەڵاتی کوردستانیش لەگەڵ نوێنەرانی رژێمی ئێران گفتوگۆ بکەن. چیرۆکی ئەو دەنگۆیە لە سمینارێکی رەزا کەعبی سکرتێری کۆمەڵەی زەحمەتکێشانی کوردستان لە سوئیس دەستیپێکرد، لەوێ ئەندامێکی یەکێتی نیشتمانی کوردستان لەکاتی دەڕبرینی بیرورای خۆی رایگەیاندبوو کە هەوڵێک بەدەستپێشخەری لایەنێکی باشووری کوردستان لەئارادایە کە گفتوگۆ لەنێوان لایەنە سیاسییەکانی رۆژهەڵاتی کوردستان لەگەڵ ئێران دەستپێبکات. رەزا کەعبی سکرتێری کۆمەڵەی زەحمەتکێشانی کوردستان بە رۆژهەڵات نیوزی راگەیاند، کە هیچ گفتوگۆیەک لەگەڵ رژێمی ئێران لە ئارادا نیە. وتیشی کە هەر لە سمینارەکەدا کە بەرەورووی ئەو پرسیارە کراوەتەوە، هەبوونی گفتوگۆیی لەگەڵ ئێران رەتکردووەتەوەو ئەوە تەنیا دەنگۆیەکە کە هیچ بنەماییەکی نیە. هاوکات ئەندامێکی رێبەریی حیزبی دیموکراتی کوردستانیش بە رۆژهەڵات نیوزی راگەیاند کە رەنگە زۆر کەس و لایەنی پارچەکانی دیکە خەم لەوە بخۆن یان هەوڵی ئەوە بدەن کە لایەنە کوردستانییەکان گفتوگۆییەکی هاوشێوەی باکووری کوردستان لەگەڵ رژێمی ئێران بکەن، بەڵام رەتیکردەوە کە هیچ هەوڵ یان تەنانەت نیەتێکیش لەئارادا بێت.
.jpg)
