بڕیارە لە ئەمرۆوە رێورەسمەکانی نەورۆزی ٢٧٢٥ لە شاری ئورمییەو ناوچەکانی دەورووبەری دەستپێبکات. بەڵام بەر لە دەستپێک لەهەموو لایەکەوە هەڕەشە لە خەڵک و چاڵاکوانان دەکرێت و هەوڵێکی زۆر بۆ رێگریکردنی هەیە. بەپێی زانیارییەکانی رۆژهەڵات نیوز، لە دوو هەفتەی رابردوودا دامودەزگا حکومییەکان و هاوکات پان تورکەکان هەموو هەوڵێکیان دا و هەڕەشەی زۆریان بۆ رێگریکردن لە رێورەسمەکان کرد. لەکۆتاییدا خەڵکەکە بڕیاری خۆیدا کە بەگڕووتین رێورەسمەکان بەرێوەببەن. لەگەڵ ئەوەش رۆژهەڵات نیوز زانیویەتی کە رێکخەرەکان و بەشێک لە چاڵاکوانان لەلایەن دامودەزگا ئەمنیەتییەکان بانگکراون و پێیان راگەیاندوون کە دەبێ بەرێژەیەکی زۆر ئاڵای ئێران لەنێو رێورەسمەکەدا هەبێت، رێورەسمەکە بە خوێندنەوەی قورئان دەستپێبکات، هاوکات پێیان وتراوە کە بەهەموو شێوەیەک لەبەرکردنی جلوبەرگی خاکی قەدەغەیەو دەبێ ژن و پیاویش لەیەکتر جیا بکرێنەوە. لەگەڵ ئەوەش وەکوو هەموو ئەو گوشارانەی بۆ شارەکانی دیکەی کوردستانیش هات، لەئورمییەش خەڵکەکە بەهەمان گڕووتین رێورەسمەکەیان بەرێوەدەبەن.
