نەورۆزی سەدان هەزار کەسی ئورمییە، پان تورکەکانی تووڕە کردووەو هاوکات ئەمرۆ چەند هەزار پانتورک لە ئورمییە، تەورێز، ئەردەبێل و زەنجان هاتبوونە ناو شاری ورمێ لەدژی کوردەکان دروشمیان دا. لەدێژەی رێورەسمەکانی نەورۆزی رۆژهەڵاتی کوردستان زیاتر لە سەدو پەنجا هەزار کورد بەشداریان لە رێورەسمی نەورۆزی ٢٧٢٥ی کوردی کرد، ئەو سەدان هەزار کوردە وێنەیەکی کەم وێنەیان لە شاری ئورمییە خوڵقاند. لەگەڵ ئەوەش دوو هەفتە بەر لە رێورەسمەکە پانتورکەکان بە شێوەی جیاواز هەڕەشەیان لە چاڵاکوانانی کورد کردبوو، کە بەهێچ شێوەیەک نابێ ئەو رێورەسمە لە ئورمییە بەرێوەبچێت. بەپێی زانیارییەکانی رۆژهەڵات نیوز، چاڵاکوانە مەدەنییەکانی شاری ئورمییە هەر زوو بڕیاریاندابوو کە ئەو رێورەسمە بەرێوەببەن. بێدەنگی دوو نوێنەرە کوردەکەی شاری ورمێش بۆ وەرگرتنی مۆڵەت یان پشتیوانیکردن لە رێورەسمەکە چاڵاکوانان و خەڵکی ورمێی نیگەران کردبوو. تەنانەت گوشارەکانی سوشیاڵ میدیا و خەڵک بۆ سەر حاکم مەمکان و شەهێن جەهانگیری گەیشتە ئاستێک کە ئەوانیش ناچار کران کە لەبەرامبەر گوشارەکان بوەستنەوەو بکەونە پشت داواکاری ئەنجامدانی رێورەسمی نەورۆز لە ئورمییە. لەکۆتاییدا رێورەسمی سەدان هەزار کەسی نەورۆز لە ئورمییە بەرێوەچوو، بەڵام ئەوە بۆ پانتورکەکان قبووڵکراو نەبوو. بەپێی زانیارییەکانی رۆژهەڵات نیوز لەهەمان رۆژدا چەند گەنجی پانتورک نێدرابوون بۆ ناو رێورەسمەکەی نەورۆز بۆ ئەوەی ئاڵۆزی درووستبکەن، بەڵام لەلایەن گەنجانی کورد دەگیرێن و دواتر بەرێزەوە لە شوێنی رێورەسمەکە دوور دەخرێنەوە. لەگەڵ ئەوەش رۆژی دواتر محەمەد خەلیل پوور گوتەبێژی شۆرای شاری ئورمییە کە ئاخووندێکی پانتورکە بانگەوازی خۆپێشاندانی عەلەوییەکان بە بۆنەی ساڵرۆژی کوژرانی ئیمام عەلی لەناو شاری ئورمییە دەدات، داواش دەکات کە خەڵکەکە لەبەرامبەر رێورەسمی کوردەکان لە ئورمییە هەڵوێستیان هەبێت. دواتر قازیپوور پانتورکێکی دیکەی دیاری ئورمییە پشتیوانی لە بانگەوازەکەی خەلیل پوور دەکات و کەناڵە پانتورکەکانی ناوخۆو دەرەوە بانگەشە بۆ خۆپێشاندانەکەو دژایەتیکردنی کورد دەکەن. ئەوەش وایکرد کە ئەمرۆ شەممە ٢ی خاکەلێوە چەند هەزار پانتورک بەجلوبەرگی رەش و هەریەکەو دارێکیان لەدەستدابوو، رژانە سەر شەقامەکان و بەتووندی دروشمیان لەدژی کوردەکان وتەوەو جارێکیتر ئیدعا بێ بنەماکانیان بەرامبەر کوردەکان دووپاتکردەوە. بەپێی زانیارییەکانی رۆژهەڵات نیوز، بەشداربووەکان پانتورکەکانی پارێزگاکانی تەورێز، ئەردەبێل و زەنجانیش بوونە، تەنانەت رێکخەرو هاندەرە سەرەکییەکان ژن و مێردێکی خەڵکی تەورێز بەناوەکانی ئوڵدوز قاسمی و ئەمیر سەتتاری بوون و هەردووکیشیان دەستبەسەر کراون. ئەگەرچی هەوڵی پانتورکەکان درووستکردنی ئاڵۆزیی بووە، بەڵام بەپێی زانیارییەکان و هاوکات ئەو ڤیدیۆیانەیش کە بڵاوکراونەتەوە، تەنانەت تورک و ئازەرییەکانی ناو ئورمییەش زۆرینەی رەهایان لەگەڵیان نەکەوتوون، کوردەکانیش کاردانەوەیان نەبووە. بەڵام پیلانی ئەو پانتورکانە لەدژی کوردەکان هی ئێستا نیەو لەمێژ ساڵە کاری بۆ دەکەن، هەربۆیە نوخبەی سیاسیی و کۆمەڵایەتی ناوخۆیی رۆژهەڵاتی کوردستانی نیگەران کردووە. بەرەی یەکگرتووی کورد لە راگەیاندراوێکدا داوا لەلایەنە پەیوەندیدارەکان دەکات کە لەدژی ئەو رەوتە هەڵوێستیان هەبێت، چوونکە خەریکن لەدژی کورد و تورکەکانی ناو پارێزگای ئورمییە ئاژاوە درووستدەکەن.
