لایەنە سیاسییەکانی رۆژهەڵاتی کوردستان هۆشداری لەپیلانگێرییەکانی رژێمی ئێران دەدەن و داوا لە کورد و ئازەرییەکانی ئورمییە دەکەن، ئاگاداری پیلانە دوژمنکارەکانی پانتورکەکانیش بن. دوای ئەوەی لەدژی نەورۆزی سەدان هەزار کەسی کوردەکان لە ئورمییە، پانتورکەکان لە ئورمییە گردبوونەوەیەکیان رێکخست و لەدژی کوردەکان درووشمیان وتەوەو هەڕەشەیان لەکوردەکان کرد. بەشێک لە لایەنە سیاسییەکانی رۆژهەڵاتی کوردستان لەراگەیاندراوی جیاجیادا کاردانەوەیان هەبووە. دەستەی کارگێری حیزبی دیموکراتی کوردستانی ئێران لەراگەیاندراوێکدا باس لەوە دەکەن:"کەمینەی پانتورکیستەکان بە دنەدان و هاوکاریی ناوەندە ئەمنییەتییەکانی کۆماری ئیسلامی ڕۆژی شەممە ٢ی خاکەلێوە بۆ نیشاندانی ناڕەزایەتی بەرانبەر بە ڕێوڕەسمی نەورۆزیی کوردان، گۆپاڵ بەدەست خۆپێشاندانێکی توندیان بە دروشمی ناتەبا و دژ بە ڕوحی ژیانی ئاشتییانەی پێکەوەیی بەڕێوەبرد. " لەدرێژەی پەیامەکەی حدکادا هاتووە:"بێگومان ئەم جۆرە هەڵسوکەوتە ناشارستانییانەی پانتورکیستەکان پیلانگێڕییەکی ڕێک خراوە و جگە لە ئاژاوەنانەوە و دووبەرەکی سازکردن لەنێوان هاونیشتمانییانی کورد و تورکی ئەو پارێزگایە کە پێشتریش ئەزموونی تاڵیان لەو بوارەدا هەبووە، هیچ قازانجێکی لێ ناکەوێتەوە و زەرەرمەندی سەرەکی تەنیا دوو گەلی کورد و تورکی ئەم پارێزگایەن." حیزبی دیموکراتی کوردستانی ئێران دەڵێ لەم سەردەمەدا کۆمەڵگەی کورد و تورک زیاتر لەهەموو کاتێک پێویستیان بە پێکەوەژیانی ئاشتییانە هەیەو داوا لە کۆمەڵگەی مەدەنیی هەردوو گەلی تورک و کورد و کەسایەتییەکان دەکات کە لەدژی هەر جۆرە چەشنە هەوڵێکی رەگەزپەرەستانەی بوەستنەوە. هاوکات کۆمەڵەی شۆرشگێری زەحمەتکێشانی کوردستانی ئێرانیش راگەیاندراوێکی بەزمانی فارسی بڵاوکردووەتەوەو لەبەشێکیدا هاتووە:"گردبوونەوەی تووندڕەوەکان دەتوانێ هەڕەشە لە ئاسایش و ئەمنییەت و ژیانی هاوبەشی کورد و تورکەکان لە ئورمییە بکات. ئەو گردبوونەوەیە لەدژی نەورۆزی کوردەکانی ئورمییە بووە، لەکاتێکدا رێورەسمەکە لە کەشێکی ئاشتیانەو هەمووی هەر خۆشی و دۆستایەتی بووەو بەهیچ شێوەیەک تووندرەوی و بێرێزی بەکەسی تێدا نەبووەو تەنانەت بەشێک لە هاوشارییە تورکەکانیش بەشداریان تێدا کردووە." کۆمەڵەی شۆرشگێری زەحمەتکێشانی کوردستانی ئێران لە پەیامەکەیدا باسی لەوەش کردووە:"جارێکیتر پێداگری لەسەر پەیوەندییە مێژوویی و دۆستایەتییەکانی هەردوو گەلی تورک و ئازەربایجان دەکەینەوەو پێداگری لەسەر گرنگی ئەو بەیەکەوە ژیانە هاوبەشانە دەکەین. پێموانوایە درووستکردنی ناکۆکی لەنێوانیان تەنیا لەبەرژەوەندی رژێم دایەو دووکەڵەکەی دەچێتە چاوی هەردوو نەتەوەی کورد و تورک." کۆمەڵە داوا لە لاوانی کوردیش دەکات کە ئارامی و لەخۆبوردوویی خۆیان بپارێزن و نەکەونە داوی تووندڕەوییەوەو چوونکە ئەو گۆرەپانە شایەنی یاریکردنی کوردەکان نیە. لەلایەکی دیکەوە کۆمەڵەی زەحمەتکێشانی کوردستانیش لە راگەیاندراوێکدا پێداگری لەسەر پەیوەندییە مێژووییەکانی هەردوو گەلی کورد و ئازەربایجان دەکات. لەپەیامەکەی کۆمەڵەی زەحمەتکێشانی کوردستاندا هاتووە:"بەڕێوەچوونی ڕێوڕەسمی شکۆداری نەورۆز لە هەموو ڕۆژهەڵاتی کوردستان و بەتایبەت لە شاری ورمێ، پەیامێکی بەهێز و ڕوونی بۆ دەسەڵاتدارانی ئێران تێدابوو. پەیامێک کە نیشاندەری وزەی پێشکەوتنخوازانە و ئازادیخوازانەی بزووتنەوەی کوردستان بوو. پاش ئەم هێزنواندنە شکۆمەندە، حکوومەتی ئێران و دەستوپێوەندەکانیان لە ورمێ کە ترسی مەرگیان لێ‌نیشتووە و دەبینن بزووتنەوەی کوردستان بە هەڵگرتنی مرۆڤانەترین و پێشکەوتووترین دروشمەکان و بەشداریی بەرینی ژنان و لاوان بەرانبەر هەموو بایەخ و سیستەمی فیکریی ئەوان وەستاوە و پێداگری لەسەر بەردەوامیی خۆی لە خەبات بۆ گەیشتن بە کۆمەڵگایەکی ئازاد و دادپەروەرانە دەکا، کەوتنە خۆ." کۆمەڵەی زەحمەتکێشان پێکەوە ژیانی ئاشتیانەی نەتەوەکانی کورد و تورکی بەمەرجی سەرەکی پوچەڵکردنەوەی پیلانەکانی رژێمی ئێران دەزانێت و رایدەگەیەنێت:"کۆمەڵەی زەحمەتکێشانی کوردستان ئەو هەوڵە نزۆک و پیلانە نگریسە حکوومەتی ئیسلامیی ئێران بە توندی مەحکووم دەکا و داوا لە خەڵکی کوردستان دەکا وەکوو هەمیشە بە وریاییەوە بەرانبەر ئەم سێناریۆیە بجووڵێنەوە و هێز و وزەی خۆیان بەرانبەر بە تاوانباری سەرەکیی ئازارەکانی خەڵک واتە کۆماری ئیسلامی بەکار بێنن. هیوادارین دانیشتوانی تورکی ورمێ نەکەونە داوی ئەم پلانەی حکوومەتەوە و دوژمنی خۆیان بناسن. خەڵکی کوردستان ئاشتیخوازن و خوازیاری هاوپشتیی میللەتان دژ بە کۆماری ئیسلامین بەڵام هاوکات پێداگری لە سەر مافی نەتەوەیی خۆیان دەکەن و ئەو هێزە بەرینەی جەماوەر کە لە نەورۆزدا خۆی دەرخست بەرانبەر بە ژمارەیەکی کەم توندئاژۆ و سیخوڕ و ڕاسپێردراوانی دەزگای ئیتیلاعاتیی حکوومەت کۆڵنادەن و پاشەکشە ناکەن." بەرەی یەکگرتوویی کوردیش هەر زوو لە پەیامێکدا کاردانەوەی لەخۆی نیشاندا، لەپەیامەکەی بەڕەی یەکگرتوویی کورددا هاتووە:"بەشێک لە تووندڕەو ئاژاوەگێر کە داریان بەدەستەوە بوو، بە جلوبەرگێکی وەکوو یەک لەناو شاری ئورمییە دروشمیان لەدژی کوردەکان وتەوە. ئەوان رێکخراوبوون، لەلایەن پانتورکەکانی ئورمییەو شارەکانی دەورووبەری ئاراستە دەکران و تەنانەت هێمای گوڕگە بۆرەکانیان وەکوو نیمادی پان تورکەکان نیشان دەدا، هەموو ئەوانەش لەبەرچآوی بەرپرسانی ئیداری و ئەمنی شاری ئورمییە بەرێوەدەچوو." بەڕەی یەکگرتووی کورد لەگەڵ هۆشداریدان لە دەرەنجامە مەترسیدارەکانی ئەو کارەی پانتورکەکان داوا لە لایەنە بەرپرسەکانی کۆماری ئیسلامی ئێران دەکات کە بەتووندی لێپرسینەوە لەو تووندڕەوانە بکەن کە دەیانەوێ بڕایەتی و دۆستایەتی کورد و ئازەرییەکان تێکبدەن.
