کۆمپانیای چینی بی وای دی بۆ بەرهەمهێنانی ئۆتۆمبێلی کارەبایی، راپۆرتی فرۆشی ساڵانەی خۆی راگەیاند، ئەو کۆمپانیایە لەساڵی ٢٠٢٤ نزیکەی ١٠٠ میلیارد دۆلار فرۆشی هەبووەو بەمشێوەیە لە کۆمپانیای تێسڵا رکابەرە ئەمریکاییەکەی پێشکەوت. کۆمپانیای بی وای دی چین کە ناوەندەکەی لە شاری شێنژ لە باشووری وڵاتی چینە، راپۆرتی دارایی ساڵی ٢٠٢٤ی خۆی راگەیاند، بەپێی راپۆرتەکە کۆمپانیاکە کە ئۆتۆمبێلی کارەبایی بەرهەم دەهێنێت، لەیەک ساڵدا ١٠٧ ملیار دۆلار فرۆشی هەبووەو بەراورد بە ساڵی ٢٠٢٣ زیاتر لە ٢٩ لەسەد فرۆشی زیادیکردووە. ئەو فرۆشە بێوێنەیەیی کۆمپانیا چینییەکە لەکاتێکدایە کە کۆمپانیای تێسڵای ئەمریکا بۆ بەرهەمهێنانی ئۆتۆمبێلی کارەبایی لەو ساڵەدا فرۆشی کەمتر لە ٩٧ میلیارد دۆلار بووە. پێشتر ماڵپەری بلوومبێرگی ئەمریکا پێشبینی ئەوەیکردبوو کە کۆمپانیای بی وای دی پێش کۆمپانیای تێسلا دەکەوێت، بەڵام شیکەرەوەکانی بلوومبێرگیش دەڵێن پێشڤەچوونی بی وای دی لە پێشبینییەکانی ئەوانیش زیاتر بووە. شارەزایانی بواری ئۆتۆمبێلی کارەبایی پێیانوایە کۆمپانیا چینییەکە گڕەوی باتری بۆ شارژکردنەوەی لە کۆمپانیای تێسڵا بردووەتەوە، بی وای دی سەرەتای ئەمساڵ تەکنەلۆژیایی سوپێر پڵاتفۆرمی راگەیاند، ئەو تەکنەلۆژیاییە وادەکات کە باتری ئۆتۆمبیلەکان تەنیا بە ٥ خولەک شارژبوونەوە، ئیمکانی ٤٧٠ کیلۆمەتر سەفەرکردن بە ئۆتۆمبیلەکان دەدات، باترییەکەی کۆمپانیا چینییەکە هەزار کیلۆ واتە، ئەوە لەکاتێکدایە باترییەکانی تێسلا ئەوپەڕەکەی تەنیا ٥٠٠ کیلۆ واتن.
