دۆناڵد ترەمپ سەرۆککۆماری ئەمریکا پێی باشە لەگەڵ ئێران لەسەر پرسی ئەتۆمی رێکبکەوێت، بەڵام دەشڵێ ئەگەر ئەوە روونەدات، رووداوی زۆر زۆر خراپ بۆ ئێران روودەدات. ئێوارەی ئەمرۆ هەینی هەشتی خاکەلێوە، دۆناڵد ترەمپ سەرۆککۆماری ئەمریکا لە کۆشکی سپی بە رۆژنامەنووسانی راگەیاند، بەوردی چاودێری ئێران دەکات. ترەمپ وتی:" پێم باشە پرسەکان بە گفتوگۆ چارەسەر بن، بەڵام ئەگەر ئەوە سەرنەکەوت، رووداوی زۆر زۆر خراپ بەسەر ئێران روودەدات، ئەو رووداوانەی حەز ناکەم رووبدەن." ترەمپ سەبارەت بە نامەکەی کە بۆ عەلی خامنەیی رێبەری ئێرانی ناردووە، رایگەیاند:"تاران دەبێ بڕیاری خۆی بدات." سەرۆککۆماری ئەمریکا پێشتریش هەڕەشەی ئەوەی کردبوو، کە یان رێککەوتنێکی نوێ یان هێرشی سەربازی. دوای ئەوەی نامەکەی دۆناڵد ترەمپ بۆ رێبەری ئێران بەراگەیاندن کرا، کاردانەوەی جۆراوجۆری لەناوخۆی ئێران لێکەوتەوە، سەرەتا وەها نامەیەک ئینکار کرا، دواتر بە فریودان و لەکۆتاییشدا عەلی خامنەیی رێبەری ئێران گەیشتنی نامەکەی پشتراست کردەوەو رایگەیاند ئەوە هەڕەشەکردنەو ئەوان رەتیدەکەنەوە. بەڵام دوای ئەوەی دۆناڵد ترەمپ لە لێدوانێکی دیکەدا، تەنیا دوو مانگی کات بەئێراندا کە رێککەوتنێکی نوێ قبووڵ بکات یان هێرشی سەربازی دەکرێتە سەر، بەرپرسانی ئێرانیش گۆرانکارییان لە لێدوانەکانیاندا بەسەردا هات. سەرەتا عەباس عێراقچی وەزیری دەرەوەی ئێران رایگەیاند کە ئەوان ئامادەن ناراستەوخۆ گفتوگۆ لەگەڵ ئەمریکا بکەن، هاوکات ئاشکراشیکرد کە وەڵامی نامەکەی ترەمپ-یان داوەتەوەو لەرێگەی وڵاتی عۆممان گەیاندوویانە. رۆژی هەینی محەمەد باقر قالیباف سەرۆکی مەجلیسی ئێرانیش هەڕەشەی لە ئەمریکا کرد و رایگەیاند کە ئەمریکا وەکوو شەقاوەیەک رەفتار دەکات، وتیشی ئەگەر پەلاماری ئێران بدات، ناوچەکە دەتەقێتەوەو بنکەکانی ئەمریکا و هاوپەیمانەکانیان لە ناوچە دەکەنە ئامانج. ئەو هەڕەشانەی واشنتن و تاران لەکاتێکدایە کە پێنتاگۆن لە یەک هەفتەی رابردوودا ژمارەی کەشتییە فرۆکەهەڵگرەکانیانی لەناوچە زیاتر کردووەو رایدەگەیەنن کە چاوەرێی بڕیارن و بۆ هەموو ئەگەرێکیش ئامادەن.
.jpg)
