لەگەڵ بەردەوامی هێرشە ئاسمانییەکانی ئەمریکا بۆ سەر بنکە سەرەکییەکانی حوسییەکانی یەمەن و قووڵبوونەوەی ناکۆکییەکانی ئەمریکا و ئێران، وەزارەتی بەرگری ئەمریکا رایگەیاند هێزەکانیان لە رۆژهەڵاتی ناوەراست زیاد کردووە. وەزارەتی بەرگری ئەمریکا پێنتاگۆن لە راگەیاندراوێکی کورتدا لەسەر زاری وەزیری بەرگری بەبێ ئەوەی وردەکاری زیاتر بڵاوبکاتەوە رایگەیاند کە هێزی سەربازی و ئاسمانی خۆیان لە رۆژهەڵاتی ناوەراست زیادکردووە. بەڵام لەگەڵ ئەوەش بەرپرسێکی سەربازی ئەمریکا کە نەیویستووە ناوی ئاشکرا بکرێت، بە ئەژانسی رۆیتێرزی راگەیاندووە لە یەک هەفتەی رابردوودا ئەمریکا ٦ فرۆکەی B-2-ی لە بنکەی سەربازی هاوبەشی ئەمریکا و بەریتانیا لە دوورگەی دیێگۆ گارسیا لە زەریای هیند جێگیر کردووە. بەگوتەی کارناسان فرۆکە شەڕکەرەکانی بی دووی ئەمریکا توانایی ئەوەیان هەیە، خۆیان لە رادارەکان بپارێزن و توانای گەورەترین بۆمب و تەنانەت بۆمبی ئەتۆمیان هەیە. شانێل پارنێڵ، وتەبێژی پێنتاگۆن لە بەیاننامەیەکدا رایگەیاندووە:" ئەگەر ئێران یان میلیشیاکانیان لە ناوچە، بەرژەوەندییەکانی ئەمریکا لە ناوچە بکەنە ئامانج، ئەوان بێ دوودڵی بەرگری لەخۆیان دەکەن. لەگەڵ ئەوەش پێنتاگۆن هیچ قسەیەکی لەسەر هێزە نوێ جێگیرکراوەکان لە دوورگەی دیێگۆ گارسیا نەکردووە. بەپێی زانیارییەکانی رۆیتێرز ئەمریکا دوو کەشتی فرۆکەهەڵگری دیکەش رەوانەی ناوچە دەکات، هەموو ئەوانە لەکاتێکدایە دۆناڵد ترەمپ سەرۆککۆماری ئەمریکا دووپاتیکردووەتەوە کە ئەگەر رێککەوتنێکی ئەتۆمی نوێ لەگەڵ ئێران سەرنەگرێت، ئەمریکا لەیەک کاتدا هەم هێرشی سەربازی دەکاتە سەر ئێران و هەمیش گەمارۆی سەختی دیکەیان دەخاتە سەر. لەلایەکی دیکەوە ئەگەرچی بەپێی زانیاریی پسپۆران هێرشەکانی ئەمریکا بۆ سەر حوسییەکان نەیتوانیوە ئامانجەکانی لەژێر زەوی کە بە شاری مووشەکی حوسییەکان ناسراوە، بپێکێت. لەگەڵ ئەوەش زۆرینەی کارناسان و چاودێران لەسەر ئەو باوەرەن جێگیرکردنی فرۆکەکانی بی دوو و هێنانی GBU-57 Massive Ordnance Penetrator 30000 وەکوو بەهێزترین بۆمبی ئەمریکا و جیهان بۆ لێدان لە بنکە ئەتۆمییەکانی ئێرانە.
.jpg)
