راپۆرت: ئورشەڵیم پۆست وەرگێران: رۆژهەڵات نیوز سەرۆکی پارتی ئازادی کوردستان و فەرماندەی سەربازی بە ئورشەلیم پۆستی وت:"ئەمریکا و ئیسرائیل ئێمە رادەستی ئێران نەکەن، یان لەبەرامبەر ئێران بەتەنیا جێمان مەهێڵن. ژەنەراڵ یەزدانپەنا، لە هەرێمی کوردستانی عێراقە. ئەو دەڵێ داواکارییەکان بۆ لامەرکەزی بێ مانایە، چونکە مافی کوردەکان لە سوریا گرەنتی ناکات و ئازادیشیان بۆ بەدی ناهێنێت. حوسێن یەزدانپەنا سەرۆکی پارتی ئازادی کوردستان داوا لە ئەمریکاش دەکات، پێگە سەربازییەکانی ئەمریکا لە هەرێمی کوردستان بمێننەوە، چونکە ئەوە دەتوانێ رێگریی لە پیلانەکانی ئێران بکات. ئەو ماوەیەک لەمەوپێش بە ئورشەڵیم پۆست-ی وت:" هەرێمی کوردستان بۆ بەرەنگاربوونەوەی هەژموونی ئێران پێویستی بە یارمەتی زڵهێزەکان هەیە." یەزدانپەنا ئاماژەی بەوەدا کە ئەمریکا، ئیسرائیل و عەرەبستانی سەعوودی نابێ کوردەکان بە تەنیا جێبهێڵن. پاک هێزێکی ناسیۆنالیست و جیاییخوازە و بنچینەکانی لەناو ناوچە کوردییەکانی ئێران دایە، ئەو ناوەچەیەی کوردەکان بە رۆژهەڵاتی کوردستان یان کوردستانی رۆژهەڵات ناوی دەبەن. ئەو حیزبە لە هەرێمی کوردستانی عێراقە. رۆژهەڵات میلیتارییترین و ژێرسەرکوتترین ناوچەی ئێرانە. نزیکەی ١٠ بۆ ١٥ ملیۆن کورد لەو ناوچەیە دەژین، کە دەکاتە ١٠ بۆ ١٧ لەسەدی هەموو دانیشتووانی ئێران. لەرووی جوگرافیش هاوسنووری کوردستانەکانی تورکیا و عێراقە. ئێران بە بەردەوامی لە بزوتنەوەو خۆراگری و سیاسەتی کوردەکان ترساوە، کوردەکان رێکخراوترین بەشی ئۆپۆزسیۆنی ئێران، هەم لەرووی سیاسی و هەمیش لەرووی سەربازی. ئەوان بە بەردەوامی بۆ پاراستنی خۆیان لەبەرامبەر هێزی سەرکوتی حکوومەتی و کوشتار لەسەر پێی خۆیان راوەستاون. هەفتەی رابردوو، مەزڵووم عەبدی فەرماندەی هێزەکانی سوریای دیموکرات کە لەژێر پاراستنی ئەمریکا دایە، لە کۆنفرانسی ئاشتی و ئاسایشی رۆژهەڵاتی ناوەراست لە شاری دهۆکی هەرێمی کوردستان بەشداربوو، و وتارێکی پێشکەش کرد. ئەو خوازیاری گفتوگۆکردن لەگەڵ رژێمی دیمەشق و جێبەجێکردنی سیاسەتی لامەرکەزی، بە مانای خۆبەرێوەبەری کرد. یەزدانپەنا گوتی لامەرکەزی بێ مانایە و رایگەیاند:" دەبێ بگەرێینەوە بۆ بنچینەی کێشەی کوردەکان، ئەوەش گرێدراوی ماهیەتی سوریایە، سوریا وڵاتێکی دەستکردە." بە گوتەی ئەو سوریا وەکوو دەوڵەت-نەتەوە لەمێژوودا نەبووە، لەکاتێکدا کوردەکان نەتەوەن، نەتەوەیەکی نیشتەجێی کۆن. یەزدانپەنا ئاماژەی بەوەشدا کە سوریا هەر لە سەرەتاوە لاواز بووەو بەردەوام کودەتای خوێنینی تێدا کراوە. تەنیا لەسەردەمی ئەسەد (مەبەست حافز ئەسەد) سەقامگیرییەک هەبووە، بەڵام ئەویش بنەماکەی پان عەرەبیسم بووە نەک ناسیۆنالیزمی سوری. ئەو گوتیشی:" کوردەکان ١٠٠ ساڵە لە پەراوێزدا ماونەتەوە، خۆتان دەبینن کە ٢٠ ساڵ دوای رووخانی رژێمی سەدام، هێشتا بەغدا هەڕەشەیەکە بەسەر هەرێمی کوردستان. هەژموونی ئێران بەسەر عێراق، پرسی کوردەکان و شەڕی ئێران-ئیسرائیل یەزدانپەنا گوتی:" کاتێک رژێمی عەرەبی-ئیسلامی ئێستا لە دیمەشق هێز و کۆنترۆڵی بۆ بگەرێتەوە، هێرش دەکاتە سەر کوردەکان، بە هەمان شێوە کە پێشتر هێرشی بۆ سەر سوەیدا و بۆ سەر خەڵکی مەدەنی دەرووزی کرد. ئەمجارەش تاوانێکی هاوشێوە ئەنجام دەدات." ئەو بە ئورشەڵیم پۆست-ی وت:" ئێمە پەیوەندییەکی بڕایانەمان لەگەڵ رێبەرانی باشووری کوردستان هەیە، ئاسایش و خۆشگوزەرانی کوردستانی باشوور بۆ ئێمە وەکوو پاک چارەنووسسازە. بەڵام بەهۆی هەژموونی تاران بۆ سەر عێراق و گوشاری حکومەتی ناوەندی بەغدا بۆ سەر هەرێمی کوردستان، ئێمە بۆ کۆنفرانسی مێپس لە دهۆک بانگهێشت نەکراین." حیزبی پاک لە شەڕ لەگەڵ هێزەکانی حەشدی شەعبی و میلیشیاکانی سەر بە ئێران و سوپای قودس رۆڵێکی گرنگیان هەبووە. ئەوکاتەی دوای راپرسییەکەی کوردستان لە سێپتەمبەری ٢٠١٧ هەوڵی گرتنی هەولێر پایتەختی هەرێمی کوردستانیان دا. لە ١٣ی ژوئەن، پاک لەو هێزانە بوو، راستەوخۆ پێشوازی لە هێرشی ئیسرائیل بۆ سەر ئێران کرد و داوای راپەرینی سەراسەری لە خەڵک کرد، لەکاتێکدا مەترسی سەرکوتکردنیش هەبوو. پاک داوای لە کوردەکان کرد هێرش بۆ سەر بنکەکانی رژێم بکەن و، تۆڵەی ئەو دەیان هەزار کوردە بستێننەوە کە لەلایەن رژێمی مەڵاکان کوژراون. دوای شکستی سەربازی ئێران لە شەڕی ١٢ رۆژەدا، دەستی بە سەرکوتکردنێکی بەرفراوان لە ناوخۆ کرد و کوردەکانیش زۆرترین زیانیان بەرکەوت. ئەو شەڕە لاوازی گرنگی لە پێکهاتەی سەربازی، ستراتیژیک و ئایدیۆلۆژی رژێمی مەڵاکان دەرخست. رژێم دەستی بە شەپۆڵێکی گەورەی دەستبەسەرکردن کرد و چەندین کەسیشی بە تۆمەتی هاوکاریکردن لەگەڵ زاهیۆنیستەکان لەسێدارە دا. زۆرترین دەستبەسەرکردنیش لە ناوچە کوردییەکان بوو چەندین کەس بە تۆمەتی سیخوریکردن دادگایی و لەبەرچاوی خەڵک لەسێدارە دران. لە سەرەتای ساڵی ٢٠٢٥ هەتاکوو ئێستا، زیاتر لە ١٥٠٠ کەس لە ئێران لەسێدارەدران، بەشی زۆریشی بەر کوردەکان کەوت. لەکۆتاییدا، سۆزان کویتاز رۆژنامەنووس و لێکۆڵەری کورد-سوئیدی ئەو راپۆرتەی ئامادە کردووە. ئەو پێشتر پەیامنێر و پرۆدیسیۆری پادکەستێک لە ناوەندی ئاسایش و کاروباری دەرەوەی ئیسرائیل بوو، ئەو لە میدیاکانی قەتەریش کاری کردووە.
.jpg)
