ئێعڵام دەسوەکارکردن جەم هاوکاری زاگرۆس

20 . ڕێبەندان . 2725

خەڵک ئازادیخواز و شەریف زاگرۆس، نەتەوەی کورد، و ڕای گشتی

لە هەلومەرجێگا ک جوقرافیای سیاسی ئێران تۊش قەیران قۊل سیاسی، کوومەڵایەتی و ئنسانیی دیرووک هاوچەرخ خوەی هاتێیە، و هەرلەیوا چۊزمان تمامیەتخوازی دەسەڵاتدار وە سەرکوت کردن فرەتر، تن‌وتێژی و دوچەوەکی سیستماتیک و نەپژرانن مافەیل بنەڕەتی نەتەوەیل و هاوڵاتییەیل، شەرعیەت ئێ حاکمیەت سیاسییە لەناو بردێیه، واقعیەت ئمڕوو ئێران فرەتر لە هەر کات و وەخت تر، ڕووشنەوکەر بنبەس دیرووکی نزام تەکڕەوانەس.

هاوەخت وەل ئێ ڕەوشا، ئۆپۆزیسیۆن دەرەوەی وڵاتیش تۊش دابڕان، بێ بەرنامەیی ستراتژیکی، لاوازی لە ناسین واقعیەتەیل مەیدانی و ناتوانی له پێشکەشکردن بەدیل یەکگرتێ و دمۆکراتیکێگ ئڕا بانان جوقرافیای سیاسی ئێران هاتێیە. بێجگە لەوەیش، لاخوازیەیل تمامیەتخواز لایەنگر پادشاهی وە واژاکردن ئولگوو ناوەندخوازی، بنپاکردن ماف ملەتەیل و لەوەرچەونەگرتن ئەسڵ برابەری سیاسی، نە تەنیا دەسمیەتدەر و پاڵپشتیکەر جمشت ئازادیخوازانە نییە، بەڵکوو وە ئەوژێر ڕکیڤ هاوردن داخوازییەیل گەل، بەربەس جدیێگ لە نوای سەقامگیری یەی ئاڵترناتیڤ دمۆکراتیک، فدراڵ و لە ڕۊ بنەمای ماف نەتەوەیل وەدی تیەرێ.

لە ناوخۆیشا، هەرچەن نەتەوەی کورد و حزبەیل سیاسی کوردستان هەمیشە لە پێشەنگەیل موبارزەی ئازادی و دموکراسی و دادپەروەری بۊنە، وەلێ لاوازی لە درس کردن یەکەی سیاسی یەکگرتێ لە ڕووژهەڵات کوردستان، کاریگەری ناسه بان دەرفەتەیل سیاسی. ئێ کەم‌وکسرییه، ئمڕوو فرەتر لە جاران، لەوای کەلین جدیێگ لە ڕێکخسن سیاسی نەتەوەی کورد لە جوقرافیای سیاسی ئێران خوەی دەرخەێ.

لەسەر ئێ بنەما، ئیمە باوەڕمان یەسە ک کورد نەتەوەیگە، ڕووژهەڵات کوردستانیش بەش جیانەکریاگێ لە خاک کوردستانە؛ خاکێگ ک ناسنامە، زوان، فەرهەنگ، دیرووک و ماف سیاسی جیاوازێگ دێڕێ ک لە چوارچوو نووڕین ناوەندخوازی و دەوڵەت-مێحوەری ئێرانا نیەتۊەنرێ پەراوێز بخریەێ. مەسەڵەی کورد مەسەڵەی نەتەوەیی و سیاسییە، نە تەنیا مەسەڵەی فەرهەنگی یا ماف کەمینەیل.

له ڕۊ ئەساس ئێ زەروورەت دیرووکییە، بڕیار دایمن وە ئامانج لەیەکخسن هێزەیل سیاسی، مەدەنی، فەرهەنگی و کوومەڵایەتی ناوچەیل زاگرۆس لە پێناو ئەویەک هاوردن یەی یەکەی سیاسی کوردستان- ئێران لەسەر بنەمای دموکراسی و ماف مرۆڤ و ماف دیاری کردن چارەنۊس هەبۊن "جەم هاوکاری زاگرۆس" ئعڵام بکەیم؛ بنکەیگ ک بتوانێ سەکووێگ ئڕا لەیەک نزیکەوبۊن، دیالۆگ، هەماهەنگی پراکتیکی و ڕێکخسن بەرپرسیارانە لە باشوور ڕووژهەڵات کوردستان دابین بکەێ.

ئێ کردەوە دەسکەفت زەروورەت عەقڵانی، دیرووکی و نەتەوەییە؛ زەروورەتێ ک لە ناتەوانی چوارچووەیل مەوجوود ئڕا پاشخوانەو دان داخوازییەیل گەل کورد و قەیران ژئۆپۆلیتیکی بەربڵاو لە ئێران سەرچەوە گرێد.

جەم هاوکاری زاگرۆس لەسەر بنەمای زەروورەت دیرووکی و کوومەڵایەتیێگ دامەزریایە:
زەروورەت یەکیەتی هێزەیل سیاسی، مەدەنی، فەرهەنگی و کوومەڵایەتی باشوور ڕووژهەڵات کوردستان وە ئامانج لەدار خسن سەکوو بەردەوامێگ ئڕا دیالۆگ و دەمەتەقە، هەماهەنگی، کردەوەی دەسەجەمی و بەرگریکردن لە ماف مرۆڤی و نەتەوەیی کورد لە جوقرافیایی سیاسی ئێرانا.

ئێ جەمە:
• دامەزراوەی سەروەخوە و غەیردەوڵەتی و غیرئنتفاعیه؛
• پەیوەندی وەل هیچ حزب و حکوومەت و دەسەڵات خاوارەیگەو نەیرێ؛
•وە بنەمایل دموکراسی، ماف مرۆڤ، یەیسانی جنسیەتی، سکۆلاریسم، فرەڕەنگی فەرهەنگی و نەپژرانن هەرجوورە ستەمکاریێگ، چ ئایینی چ سەڵتەنەتی؛ پابەنە،
• گەل کورد لەوای گەل خاون ماف چارەی خوەنۊسین ناسێ؛
• پابەنە وە بەشداریەتی، شەفافیەت، جواودانەوە و ڕێبەری وەکوومەڵ.
ئێ جەمە یەی حزب سیاسی یا ئاڵترناتیڤێگ لەبرابەر حزبەیل کوردی نییە.

ئەوڕەسین ئیمە یەسە ک بێ ڕێکخسن سیاسی سەروەخوە و هووشیارانەی گەل کورد، هیچ گووڕانکاری دمۆکراتیکێگ لە جوقرافیای سیاسی ئێران دەوام نیەتیەرێد و وەبێ هاوپشتی زاگرۆس، سەقامگیری یەی یەکەی سیاسی یەکگرتێ ئڕا ڕووژهەڵات کوردستان ممکن نییە.

ئێعڵام دەس‌وەکارکردن جەم هاوکاریی زاگرۆس هاوەختە وەگەرد ناڕزایەتی دەربڕین تر لەلایەن خەڵک ئازادی‌خواز، دژ وە ڕژیم دیکتاتور جومهووری ‌ئسڵامی ئێران ک لەی ڕێیه وە داخەو شمار فرەیگ له هاوڵاتیەیلمان وە دەس داگیرکەر گیانێیان لەدەس دانە، یان زامدار و دەسوەسەر بۊنە.
هەر وەی بوونەوە لە قوڕن دڵا هاودەنگی و هاوسووزی خوەمان وەگەرد خەڵک ناڕازی کوردستانا ئێعڵام کەیم؛ خەڵکێ ک بوێرانە و دلێرانە هەزینەی گرانێگ دانە و خوازیار ئازادی، کرامەت ئنسانی، دادپەروەری کوومەڵایەتی و بانان دمۆکراتیکێگن.

ئیمە وەتایبەت ئەو گیانبەختکریایله ئەوهۊر تیەریمن ک لە ناڕەزایەتیەیل گشتی لە ناوچەیل زاگرۆس، واورێز کرماشان، ئیلام و لوڕستان گیانیان لەدەس دان، سەرسڵامەتی دەیمنە بنەماڵەی داخدارێیان و لەسەر حەقانیەت ناڕەزایەتی مەدەنی و ئاشتیخوازانەی گەل جەخت کەیمن.

له کووتاهی له چالاکەیل ناوچەی زاگرۆس ک کوروورەی کار هاوبەش و هەنگاو هەڵگرتن لە ڕێ ئامانجەیل جەم هاوکاریی زاگرۆس دێرن داوەت کەیم له ڕێ ئادرس ئیمەیل Jemzagros@gmail.com وەلمانا پەیوەندی بگرن.