دکتور جەلال جەلالیزادە نوێنەری پێشووتری شاری سنە لە مەجلیسی ئێران بە رۆژهەڵات نیوزی راگەیاند کە خۆی بۆ هەڵبژاردنی سەرۆککۆماری ئێران کاندید دەکات. جەلالیزادە سەبارەت بە هۆکاری ئەو بڕیارە بە رۆژهەڵات نیوزی گوت کە دڵنیایە کە شیاوی پەسەند ناکرێت، بەڵام بەو کارە دەیەوێ رژێم تووشی چالش بکات ، و هاوکات وەبیر کوردستانیان و خەڵکی ئێران و کۆمەڵگەی نێودەوڵەتی بهێنێتەوە کە ۱۷ ملیۆن سوننە مەزهەب و ٨ ملیۆن کورد لە ئێران هیچ مافێکیان نیەو تەنانەت جێگری وەزیرو بەرێوەبەرێکی گشتیشیان پێ ڕەوا نابینن.
جەلالیزادە بۆ رۆژهەڵات نیوزی روونکردەوە کە لەسەر بڕیاری خۆ کاندیدکردنی پێداگرە، لەکاتێکدا بە پێی دەستووری ئیران ئەو هەر لەسەرەتاوە وەکوو سوننە مەزهەبێک بۆی نیە خۆی کاندید بکات. بەڵام بە گوتەی ئەو ئەگەر شیعە مەزهەبیش بووا هەر شیاوی پەسەند نەدەکرا. جەلالیزادە ئەوەشی روونکردەوە کە خەڵکی کوردستان دەبێ رۆژێک لەخۆیان بپرسن، کاتێک ناتوانن کاندیدی خۆیان هەبێ، چۆن حکومەت چاوەروانی دەنگدانی لێیان هەیە، هەر بۆیە بۆ وەبیرهێنانەوەی ئەو هەڵاواردانە خۆی بۆ هەڵبژاردنی سەرۆککۆماری ئێران کاندید دەکات.
لەگەڵ ئەوەی جەلیزادە لەسەر خۆکاندیدکردن پێداگرە، بەڵام بەپێی ئەسلی ١١٥ی یاسای بنەڕەتی کۆماری ئیسلامی ئێران کاندیدی سەرۆککۆماری دەبێ لەپیاوانی ئایینی سیاسی بێت و هاوکات پێرەوی مەزهەبی فەرمی واتە شیعە بێت.
