پەیامێک لە بنەماڵەی شۆرشی ژینا بۆ بنەماڵەی شەهیدانی بەفڕانبار (کرماشان، ئیلام، لوڕستان)

1 . ڕەشەمە . 2725

بەناوی کۆمەڵێک لە بنەماڵەکانی شەهیدانی ڕاپەڕینی ژیناوە، پرسە و سەرەخۆشیی خۆمان ئاراستەی بنەماڵەی شەهیدانی بەفرانباری ٢٧٢٥ی کوردی (١٤٠٤ی هەتاوی) لە شار و شارۆچکەکانی کرماشان، ئیلام و لوڕستان وسەرجەم شەهیدانی ڕێگای ئازادی ڕادەگەیەنین. کوردستان ئەزموونی لەم چەشنەی زۆر جار بە خۆیەوە دیوە، بەڵام هیچ چارەێکمان نییە جگە لە بەهێز بوون و درێژە دان بە خەبات بۆ دابینکردنی ژیانێکی سەربەرزانە، ئازادانە و دادپەروەرانە. ئامانجێکی بەو ڕادەیە گرینگ تەنیا بە ڕێزگرتن لە ئامانجی شەهیدان و یەکیەتی و یەکگرتوویی دەستەبەر دەبێت.

لەڕێگەی ئەم ڕاگەیاندراوەوە، دەمانهەوێ پێداگری لەسەر ئەم ڕاستییە بکەین کە ژیانی ئازاد و دادپەرەوەرانە لە کوردستانێکی ڕزگارکراودا بە یەکگرتن، هاودەنگی، هاوپشتی، تێکۆشانی بەکۆمەڵ و سیاسەتی ڕوون و ڕاشکاوانەی سەرجەم تێکۆشەرانی ڕێگای ئازادی دەستەبەر دەبێت. گەیشتن بە ئازادی، بەندە بە خۆ دوور گرتن لە هەرچەشنە قۆرخکاری و کەڵکاوەژۆیەک لە ناو و خوێنی شەهیدان لەپێناو هەر بیر و باوەڕێکی ئایدیۆلۆژی و سیاسیی. شەهیدانی ئێمە لە ماکۆوە هەتا لوڕستان، لە هەموو قۆناغەکاندا، شەهیدانی خەبات و تێکۆشان لەپێناو ڕزگاری و ئازادیی کوردستاندان.

لە دۆخی شڵەژاو و پڕ لە دڵەڕاوکەی ئەم ڕۆژانەدا، وەک بەشێکی بچووک لە کۆمەڵگەی کوردستان، دڵسۆزانە داوا لە چالاکانی مەدەنی و سیاسی، خەباتکارانی هۆشیار و حیزبە سیاسییەکان و... دەکەین کە زۆر خێرا و بە هەموو هێز و تواناوە، بەر لەوەی دەرفەتەکان لەدەست بچن، یەکیەتییەکی سەرتاپاگیر و ڕاستەقینە پێکبهێنن. بەبێ ڕاگەیاندنی یەکیەتییەکی بەهێز و مانادار، ڕەنگە بێهیوایی باڵ بەسەر نەتەوەی کورد لە ڕۆژهەڵاتی کوردستاندا بکێشێت و ترس لە زاڵبوونەوەی جۆرێکی دیکە لە داگیرکاری، ببێتە هۆی پەرتەوازیی و لەیەک دابڕانی زیاتر لەوەی کە ئێستا هەیە.
هیوادارین نەتەوە ستەملێکراوەکانی تریش بە یەکدەنگی ئازادیی خۆیان دەستەبەر بکەن

یەکگرتوویی لەپێناو ئازادی

کۆمەڵێک لە بنەماڵەکانی شەهیدانی کوردستان لە ڕاپەڕینی ژن ژیان ئازادی