گفتوگۆکەی ترەمپ و هیجری- هاوکاری هاوپەیمانی کوردستان و ئەمریکا

13 . ڕەشەمە . 2725

دۆناڵد ترەمپ سەرۆککۆماری ئەمریکا و مستەفا هیجری سکرتێری حیزبی دیموکراتی کوردستانی ئێران لە پەیوەندییەکی تەلەفوونیدا باسیان لەدوا گۆرانکارییەکانی ئێران کردووەو ترەمپ پشتیوانی لە کوردەکان دەربڕیوە.

رۆژی سێشەممە ١٣ی رەشەممە، ماڵپەری واڵ ستریت ژورناڵی ئەمریکا رایگەیاند، دۆناڵد ترەمپ سەرۆکی ئەمریکا ئامادەیی خۆی بۆ پشتیوانیکردن لە پێشمەرگەی رۆژهەڵاتی کوردستان دەربڕیوە، بۆ ئەوەی هاوکات لەگەڵ هێرشە ئاسمانییەکانی ئەمریکا و ئیسرائیل، لەسەر زەوی ناوچەکانیان بگرن. هاوکات هەر ئەمرۆ سەرچاوەیەکی ئاگادار بە رۆژهەڵات نیوزی راگەیاند، دۆناڵد ترەمپ و مستەفا هیجری سکرتێری حدکا لە پەیوەندییەکی تەلەفوونیدا باسیان لە دوا گۆرانکارییە مەیدانییەکان لە ئێران و کوردستان کردووە. کەناڵی رووداو و دواتر ماڵپەری سی ئێن ئێن-ی ئەمریکاش ئەو هەواڵەیان پشتراست کردەوە.

رۆژی پێشتر ماڵپەری ئاکسیوسی ئەمریکایی بۆ یەکەمجار ئاشکرایکرد، دۆناڵد ترەمپ سەرۆککۆماری ئەمریکا رۆژی یەکشەممە پەیوەندییەکی تەلەفوونی لەگەڵ مەسعود بارزانی سەرۆکی پارتی دیموکراتی کوردستان و بافل تاڵەبانی سەرۆکی یەکێتی نیشتمانی کوردستان کردووەو گفتوگۆکانیش پەیوەندیدار بە دۆخی ئێستای ئێران بووە.
سەبارەت بە پلانی دۆناڵد ترەمپ و حیزبەکانی رۆژهەڵاتی کوردستان، ماڵپەری سی ئێن ئێنی ئەمریکا راپۆرتێکی بڵاوکردەوەو لەگەڵ پشتراستکردنەوەی گفتوگۆ تەڵەفوونییەکەی ترەمپ و هیجری، ئاشکرایکرد لایەنە کوردستانییەکان رێکخراون و هێزی چەکداری ئامادەیان هەیە، هەربۆیە ئەوان لەسەر زەوی و ئەمریکا و ئیسرائیل لە ئاسمان دەتوانن لەناو خاکی ئێران و کوردستان بچنە پێش، بەمشێوەیە شەڕەکە دەکەوێتە سەر زەوی و دەچێتە قۆناغێکی دیکەوە.

دوای ئەوەی پێنج لایەنی سیاسیی رۆژهەڵاتی کوردستان هاوپەیمانیی هێزە سیاسییەکانی کوردستانی ئێرانیان راگەیاند، کاردانەوەی زۆری ناوخۆی و نێودەوڵەتی لێکەوتەوە. رۆژهەڵات نیوز زانیویەتی، لە گفتوگۆ تەلەفوونییەکەی سەرۆککۆماری ئەمریکا و سکرتێری حیزبی دیموکراتی کوردستانی ئێران باس لەو هاوپەیمانییەش کراوە.