پژاک، دیموکرات و کۆمەڵە بەهۆکاری بەشداری پێنەکردن لە "کنگرەی آزادی ایران" دەزانێت

7 . خاکەلێوە . 2726

کۆمیتەی دەرەوەی پارتی ژیانی ئازادی کوردستان - پژاک لە راگەیاندراوێکدا رەخنەی تووند لە ئامادەکارەکانی "کنگرە آزادی ایران" دەگرێت و دەڵێ حیزبی دیموکرات و کۆمەڵەی شۆرشگێری زەحمەتکێشانی کوردستانی ئێران هۆکاری بەشداری پێنەکردنیان بوونە.

ئەمرۆ هەینی، کۆمیتەی دەرەوەی پژاک راگەیاندراوێکی بڵاوکردووەتەوەو تێیدا هاتووە، لەرۆژانی رابردوودا گفتوگۆ و هەماهەنگیان لەگەڵ بەرێوەبەرانی "کنگرەی آزادی ایران" کردووە، کە بڕیارە شەممە و یەکشەممە کۆنفرانسێک لە لەندەن بەرێوەببەن. پژاک دەڵێ، بڕیار بووە ئەوانیش بەشدار بن، چوونکە هەستیان کردووە، ئامانجی کۆنگرەکە جیاوازە.

بەڵام کە لیستی بەشداربووانی کۆنگرەکە بڵاودەکرێتەوە، پژاکی تێدانیە. کۆمیتەی دەرەوەی پژاک لەگەڵ رەخنەی تووند لە بەرێوەبەرانی "کنگرەی آزادی ایران"، حیزبی دیموکراتی کوردستانی ئێران و کۆمەڵەی شۆرشگێری زەحمەتکێشانی کوردستانی ئێرانی بە هۆکاری بەشداری پێنەکردنیان لەو کۆنگرەیە ناو بردووە.

لەو کۆنفرانسەدا کە بڕیارە سبەی و دووسبەی لە لەندەن بەرێوەبچێت، جگە لە خالید عەزیزی وتەبێژی حدکا و ناهید بەهمەنی ئەندامی دەفتەری سیاسی کۆمەڵەی شۆرشگێر، چەندین ئاکادیمیسییەنی کوردیش بەشدارن.