رێبەری دەیان وڵاتی جیهان دوو رۆژ لە بورگن ستۆکی سوئیس کۆدەبنەوە، بۆ ئەوەی چارەسەرێک بۆ قەیرانی ئۆکرانیا بدۆزنەوە، هەربۆیە ناوی لوتکەی ئاشتی ئۆکرانیایان لێ ناوە.
کۆبوونەوەکە رۆژی یەکشەممە دەستپێدەکات و دوو رۆژ دەخایەنێت، کەماڵا هەریس جێگری سەرۆکی ئەمریکا و رێبەرانی دەیان وڵاتی دیکەی جیهان لەو کۆبوونەوەیەدا بەشدار دەبن. سەرۆکی وڵاتانی فەرەنسا، ئاڵمان، ئیتاڵیا، بەریتانیا، کەنەدا، ژاپۆن، هیندستان، تورکیا و مەجارستان لەگەڵ دەیان ناوەند و کۆمپانیای دیکەی نێودەوڵەتی دیکەی جیهان بەشدار دەبن. ئەوان دەیانەوێ لەو لوتکەیەدا گوشارەکانیان بۆ سەر رووسیا چڕبکەنەوە، بۆ ئەوەی رێگەیەک بۆ کۆتایی هێنان بەو شەڕە بهێنن.
لە ناو وڵاتە دیارو بەهێزەکانی جیهان، چین بەشداری ناکات. ئەگەرچی پێشتر سەرۆکی چین رایگەیاندبوو کە بەدواداچوون بۆ داواکارییەکە دەکەن، بەڵام لەئەنجامدا بەشداری نەکرد، ئەوەش گرفتێکی جیدییە بۆ لوتکەی ئاشتی ئۆکرانیا، چوونکە چاودێران پێیانوایە ئەگەر لەو هاوپەیمانییەدا چین بەشداری نەکات، گوشارەکانیان بۆ سەر رووسیا کاریگەری پێویستی نابێت. خودی رووسیاش رایگەیاندووە کە لوتکەی بەناو ئاشتی ئۆکرانیا لە سوئیس بەفیرۆدانی کاتەو هیچ ئەنجامێکی نابێت.
ئێستا لەشەڕی ئۆکرانیادا داشی رووسیا سوارە، ئەو ناوچانەی کە کرملین ئامانجی بوو، لەلایەن رووسەکان داگیرکراون و ڤیلادیمیر پۆتن سەرۆککۆماری ئەو وڵاتە رایگەیاندووە کە ئێستا نزیکەی ٧٠٠ هەزار سەربازیان لە خەریکی پاراستنی ئەو هەرێمانەن کە داگیریان کردوون. لەو دۆخە خراپەی کیێڤدا، زلینسکی سەرۆککۆماری ئۆکرانیا داوای لە سوئیس کردبوو کە لوتکەی وڵاتانی پشتیوانی ئۆکرانیا بە ئامادەبوونی رووسەکانیش بەرێوەببات، بۆ ئەوەی بتوانن بگەنە چارەسەرێک.
