نووسین: دکتور حیسامەدین (هیوا) خاکپوور پرسیارە بنەڕەتییەکە چییە؟ مرۆڤی بێدەسەڵات و تیۆریی قەرەبووکردنەوە... لە فەزای گشتیدا باسوخواس زۆرە لەسەر ئەوەیکە: بۆچی کورد ئەوندە خۆی نوقمی دینی ئیسلام کردووە کە بۆ نموونە لە خودی عەرەبەکان زیاتر خەمی غەززە دەخوات و بگرە بە پێی تواناش زیاتر لەوان کومەک دەنێرێت؟ نەک هەر بۆ ئیسلام و موسلمین بۆ ئایدیۆلۆژیاکانی تریش ئەمە هەر ڕاستە، کەواسووری بەر کاروانی مارکسیستی نوێ کە لە هەوڵی گۆڕانی تەواوی جیهان و مرۆڤ دایە هەر لە نێو کورداندایە!! بە ڕاستی دەبێت بپرسین ئەرێ بۆ لە درێژایی مێژووی ئیسلامدا نوخبەی کورد لە شارەزوورییەکان و دینەوورەییەکان و... موتڵەقەن جیهانی کوردی خۆی بۆ گرینگ نەبووە و خۆی تەرخان کردووە بۆ فەرهەنگی عەرەبی ئیسلامی. ئەمە لە چییەوە دێت؟ و دەرد لە کوێوەیە و ڕەنج لە کوێوەوەیە؟ من پێموایە باسەکە ناگەڕێتەوە بۆ خلووسی نییەت و ئەخلاقبەرزی مرۆڤی کورد، چونک ئەمە لە ڕووی مرۆڤناسییەوە ناسەلمێندرێت کە کورد پاکتر بێت لە خەڵکانی تر یان ساویلکەتر بێت. کەوایە ماجەرا چییە و بۆ وایە؟ بنجکۆڵکردنی ئەم بابەتە خوێندنەوەی چڕ و پڕ و هەمەلایەنەی لە بوارە جۆراوجۆرەکاندا دەوێت. بەڵام ئەونەی من لەسەریم خوێندبێتەوە لە درێژایی مێژوویی ئیسلام و هەروەها لە دەورانی مۆدێرندا، وەک ورووژاندنی گریمانەیەک دەتوانم باس لەوە بکەم کە مرۆڤی کورد بە هۆی بێدەسەڵاتی و لاوازیی و ژێردەستەبوونیدا، سایکۆلۆژیایەکی تایبەتی پەیدا کردووە، ئەویش دەتوانین ناوی بنێین "خۆتواندنەوە لە بابەتی گەورەتر" بۆ " قەرەبووکردنەوەی ڕەنجەکان" . لە ئامێزگرتنی بابەتی گەورەتر لە نەتەوەکەی خۆی بۆ ئەوەی گوایە لە ڕەنجی ژێردەستەیی ڕزگاری بێت، بۆ ئەوەی ببینرێت و بۆ ئەوەی بە مرۆڤ حیساب بکرێت. واتە ئیسلام و یان مارکسیزم و... کە ئیدعای گەورەتر لە خۆی و نەتەوەکەی دەکات، دەیهەوێت قەرەبووی بێدەسەڵاتییەکەی بە شێوەیەکی تر بۆ بکاتەوە. واتە وەک بڵێی خێری لە کوردبوونی نەدیوە دەیهەوێت لە بابەتێکی واڵاتر و گەورەتردا خۆی بنوێنێتەوە. دەخوازێت جاری وایە بە هەمەتوان( omnipotent )نیشاندان و خۆتەرخانکردنی خارج لە توانا، قەرەبووی بێدەسەڵاتی و لاوازیی و مەرگەژینی خۆی بکاتە. بەم شێوە قەرەبووی ئەو بۆشاییەی بە ئەمرێکی لە زەینی خۆیدا مەزنتر بکاتەوە. هەربۆیە وادەزانێ ئیسلام دەتوانێت ئەو بۆشاییەی بۆ پڕ بکاتەوە. مرۆڤی ناو نەتەوەی خاوەن دەسەڵات هەندێک ئازادی و عیزەت و کەرامەتی پارێزراوە، ژەهری ژێردەستەیی نەچێشتووە کە پێویستی بە تیۆری قەرەبووکردنەوە بێت. ئەو مرۆڤە وەک کورد نییە کە لە لاوازیی و بێدەرەتانیدا، سەری خۆی هەڵگرێ بۆ ئەمرێ کە بە ڕواڵەت وادەزانێت دەتوانێت ڕزگاریی و ئاسوودەیی بۆ قەرەبوو بکاتەوە و هیچ کاتێکیش بیر لەوە ناکاتەوە ئەی نەتەوەکانی تر بۆ وەک کورد خۆخواز خۆیان، یەکسەرە، تەرخانی ئیسلام ناکەن. من وایدەبینم ئەگەر کورد وەک خۆی و بۆ خۆی خاوەن دەسەڵات بوایە، ئەوندە لە هەوڵی جوبرانی ئەو کەمایەسییەدا نەدەبوو کە بێتە کەوا سووری بەر قافڵەی ئیسلام و ئایدیۆلۆژیاکانی تر... جێگەی سەرسووڕمان و تێڕامانە لە مێژووی ئیسلامدا هەموو نەتەوەکان لە سەر وەزنی قەسیدەی " لامیه العرب"، یەک لامیه العجم یان یەک لامیه التورک و...یان هۆنیوەتەوە. کورد بە تەنیا خۆی و بە زمانی عەرەبی نزیکەی شەش لامیه الکوردی هەیە. ئەمە یانی باوەشکردنی کۆیلەی پەڕاوێزکەوتوو بە ئەربابدا بۆ قەرەبووکردنەوەی بۆشایی ژێردەستەیی... ناکرێت بڵێیت مرۆڤی کورد زۆر مرۆڤێکی باش و سادقە و لە عەرەب زیاتر ئیسلامی دەوێت. تۆ دەبینیت مەلای گەورەی کۆیە خیتاب بە مەلیک فەیسەڵ دەڵێت: هەر کوردە بەڕاستی موسوڵمانە. ئەم ڕستە پێمان دەڵێت کەواسووری بەر قافڵەبوون یانی چی... لێرەدا تەنیا لایەنێک لە باسەکەم هەڵکۆڵی و توێکڵی زۆری هەیە و توێژەران دەتوانن کاری زۆر جیدیتر لەسەر ئەم پرسیارە بنەڕەتییە بکەن... بۆ خۆشم هەر لەسەری دەخوێنمەوە. تێبینی: ئەم باسە بە مانای دژایەتی تەک ئیسلام و یان مارکسیزم و ...نییە، چونک خودی ئەوانە تەفسیری زۆریان لێکراوە و شتی جۆراوجۆری تێدایە. باسەکەم ڕوو لە ڕەوانی مرۆڤی کورد بوو...
