بە هۆی هەڵەی تکنیکێوە بابەتەکە نیشان نادرەت Rojhelat News شانۆی هەڵبژاردن لە دەسەڵاتی دیکتاتۆری ئاخوندان، بۆ کام مەبەست!
Weather widget for website

شانۆی هەڵبژاردن لە دەسەڵاتی دیکتاتۆری ئاخوندان، بۆ کام مەبەست!

21.02.2024 21:58:53
شانۆی هەڵبژاردن لە دەسەڵاتی دیکتاتۆری ئاخوندان، بۆ کام مەبەست!

عەلی بەهرامی
رێژیمی ئاخوندی لە ڕۆژی هەینی ١١ی ڕەشەممەی ١٤٠٢ی هەتاوی، شانۆگەری هەڵبژاردنی هەر دوو مەجلیسی بەناو شارەزایان و شۆرای ئیسلامی! بەڕێوە دەبات. ئاخوند خامنەیی وەلی فەقیهی ئەو رێژیمە و تێکڕای دامودەزگاکانی ئەو دەسەڵاتەیش لە چەند مانگ لەوە پێشەوە کەوتوونە هەوڵی ئەوەی بەو میکانیزمانەی بە دەستیانەوەیە جەماوەرێک بەرنە سەر سندووقەکانی دەنگدان.  

لەوەی کە هەڵبژاردن لە رێژیمی ئاخوندیدا شانۆگەریەکی گاڵتەجاڕانەیە و لەگەڵ هەڵبژاردنێکی ئازاد دا خاڵی هاوبەشیان نیە، هیچ قسەیەک نیە. بەڵام گرینگی ئەو هەڵبژاردنانە و بەشداری جەماوەر تیایاندا، لە سیستەمی ویلایەتی فەقیهدا وەک هۆیەک بۆ مەشروعیەتی ئەو دەسەڵاتە دەرخواردی ڕای گشتی لە ناوخۆ و دەرەوە، دەدرێ. بەتایبەت لە دوو ساڵ لەوە پێشەوە، بە سەرهەڵدانی شۆڕشی ژینا و بە بەشداری و لێک گرێدانی خەباتی نەتەوە مافخوازەکانی ئێران، جارێکی دیکە توانیان مەشروعیەت لەو دەسەڵاتە بسێننەوە و بۆ هەموو لایەکی بسەلمێنن کە ئەو دەسەڵاتە پێگەی جەماوەری نیە و ویستی جەماوەر ڕووخانی یەکجاری دەسەڵاتە و ئەو رێژیمە تەنیا بە زۆری هێز خۆی راگرتووە.  

لەبەرامبەردا کێشەکانی خەڵکی ئێران لە چاو یەک دوو ساڵی رابردوو نەک کەمی نەکردووە بەڵکوو کێشە ئابووری و کۆمەڵایەتیەکان بەرزبوونەوەی زیاتریان بەخۆوە بینیوە و فەزای کۆمەڵگا لەلایەن دەسەڵاتەوە زیاتر ئەمنیەتی کراوە و گوشاری ناوەندە سەرکوتگەرەکان بە گرتن و راوەدوونان و ئیعدامی ناڕازیان، زیادی کردوە. بە کورتی رێژیمی حاکم لە ئێران وێڕای بینینی کاریگەریەکانی شۆڕشی ژینا، نەک هەوڵی نەداوەو نەیتوانیوە ئاوڕ لە ویستەکانی خەڵکی ئێران بداتەوە، بەڵکوو بەرزبونەوەی نرخی کەلوپەل هەوسارپچڕاوتر بووە و هەڵاوسان زیادی کردووە و نرخی دراویش زیاتر دابەزیوە. بۆیە لە ئێستادا شاهیدی بەربڵاوتربوونەوەی ناڕەزایەتیەکان لە هەموو ناوچەکانی ئێرانین.  

لە وەها دۆخێکدا رێژیمی ئاخوندی مەبەستی لە ئەنجامدانی شانۆی هەڵبژاردنەکانی هەر دوو مەجلیسەکەی بۆچیە؟ ئاخوند خامنەیی دەیەوێ بە وەڕێخستنی ئەم جۆرە شانۆگەریە بەناو هەڵبژاردن، لەلایەک لە بەرامبەر خەڵکدا مانۆڕی هێز و دەسەڵات لێدا و پێگەی جەماوەری خۆی نیشان بدات و هاوکات بە کۆمەڵگەی جیهانی بڵێ لە ئێراندا ئاسایش و ئارامی هەیە و خەڵک دەنگ بە دەسەڵاتەکەیان دەدا و مەشروعیەتی خۆیان لە دەنگی خەڵکی ئێرانەوە وەردەگرن.  لەلایەکی دیکەوە دەسەڵات دەیهەوێ بە هەڵبژاردنەوەی ئەو دوو مەجلیسەی خۆی، ئامادەکاریەکان بۆ جێگرەوەی وەلی فەقیه تەواو بکات. خامنەیی بە دانانی رەئیسی بە سەرەککۆماری رێژیم بەبێ گوێدانە دەرەنجامەکانی، یەکەم هەنگاوی نا و ئیستایش بە رەتکردنەوەی سەڵاحیەتی بەربڵاوی ئەوانەی خۆیان پاڵاوتبوو، مەبەستیەتی هەر دوو مەجلیسەکە لە مۆرە هەرە گوێ لەمست و گوێڕایەڵەکانی پڕ بکاتەوە و لە دیاری کردنی جێگرەوەی خۆیدا هیچ بەرهەڵستیەک نەیەتە ڕێی.  

لە بەرامبەردا پێویستە چالاکان و بزوتنەوەی ئازادیخوازی کورستان و ئێران ڕێکار و میکانیزمی کاریگەر بگرنەبەر بۆ ئەوەی خامنەیی و دەسەڵاتە سەرکوتگەرەکەی لەم 

شانۆگەریدا شکست بهێنن. ئەو ڕێکار و میکانیزمانەش برینین لە:
۱-  بایکۆتی گشتی و هەمە لایەنەی شانۆی هەڵبژاردنەکان لەلایەن هێز و لایەنە سیاسیەکانی کوردستان و ئێران. 
۲_ تەبلیغاتێکی بەرین و ڕوونکردنەوەی لایەنە باش و بەسودەکانی سیاسەتی بایکۆت.
۳- پێش گرتن لە هەر جۆرە تەبلیغات و بازاڕگەرمیەک لەلایەن مۆرەکانی ڕێژیمەوە.
٤- بە هاوکاری و هەماهەنگی هێز و لایەنەکان پێش بە بەڕێوەچوونی دەنگدان و داخستنی بنکەکانی بەڕێوەچوونی ئەو سیناریۆیە، بگرن.    

ئاکامی ئەم باسە ئەوەیە کە لە دەسەڵاتێکدا کە خەڵک هیچ کات سەنگ و پێوەر نەبوون و لەو دەسەڵاتەدا بەشیان تەنیا نەهامەتی و ژیانی قورس و حەستەم بووە، نابێ رێگە بدرێ بەرچاویان لێڵ بکرێ و بکەونە ژێر کاریگەری پروپاگەندەی ئاخوندانی فێڵباز. بەڵکوو بە هەوڵی هەمە لایەنەی ئازادیخوازان ئەم شانۆگەریەش لەلایەن خەڵکی کوردستان و ئێرانەوە بایکۆتی بەرفراوان بکرێ و ئەو شانۆگەریە بکرێتە دەرفەتێکی دیکە بۆ سەلماندنی نامەشروع بوونی دەسەلاتی ئاخوندان و بەوەیش هەنگاوێکی دیکە لە خەباتی ئازادیخوازانەی گەلانی ئێران بۆ پێشەوە ببرێ.



0

گرفتەکانی هێزی سیاسی و بژاردەی کوردستانی لە ڕوانگەی "سێ ئایندە"
عمیق‌تر از شادی و عظیم‌تر از غم
داستان این دو شهر (نگاهی بە وضعیت هستی شناسانە کوردها در انتخابات اخیر اورمیە)
ئایا تورکیا و ئێران لەسەر ئازەربایجانی رۆژئاوا بەرەو پێکدادان دەچن؟
دین و نیشتمان لە ڕوانگەی بابا سەرهەنگ و حاجی وە
وەڵام بۆ دوو پرسیاری پێچەوانە لەمەڕ#کۆمەڵەی_زەحمەتکێشانی_کوردستان