سەرچاوە سروشتییەکانی پارێزگای سنە رایگەیاند لە ٣ مانگی یەکەمی ئەمساڵدا لە ٤٠ دارستانی پارێزگای سنە ئاگرکەوتووەتەوەو نزیکەی هەزار هەکتار دارستان سووتاون.
ئەمرۆ سێشەممە ١٩ی پووشپەر بێهزاد شەریفی پوور بەرێوەبەری بەرێوەبەرایەتی سەرچاوە سروشتییەکانی پارێزگای سنە رایگەیاند لەکۆی ٤٠ رووداوی ئاگرکەوتنە لە دارستانەکانی ئەو پارێزگایە ٩١٣ هەکتار دارستان سوتاون و زیانێکی زۆر لە ژینگەی ناوچەکەش دراوە.
رووداوەکان لەزۆربەی ناوچەکانی پارێزگای سنە بووە، لە بانە ١٠ ئاگرکەوتنەوە، لە دیواندەرە ٤ رووداو، لە سەقز ٥ رووداو، لە قوروە ٢ رووداو، لە سنە ٢ رووداو و لە مەریوانیش ٥ رووداوی ئاگرکەوتووەتەوە. بەپێی بەرێوەبەری بەرێوەبەرایەتی سەرچاوە سروشتییەکانی پارێزگای سنە، زۆرترین زیان لەو ئاگرکەوتنەوانە لە دارستانەکانی مەریوان بووەو بەو هۆیەوە ٩٣ هەکتار دارستان لەناوچووە.
