ژیوار رەسووڵی ھەموو كتێبەكانی جیھان بخوێنیتەوە، ناتوانی ببی بە كاریزما، ھیچ بڕوانامەیەكی زانكۆش، كاریزمای پێ درووست نابێت. ھەموو چەكوچۆلی سەر ئەو گۆی زەوییە ناتوانێ تاقە یەك كاریزما بەرھەم بھێنێت. بەھیچ پارەو پوولێك كاریزمایەك نە درووست دەبێت و نە دەشكردرێت. كاریزماكان كار بە ھزریان دەكەن، نەك بە ھێزیان، ھەربۆیە كاریزماكان دەرەنجامی ئازارو ئاواتی گروپ یان نەتەوەیەكن. مێشكی كاریزماكان گرێدراوی دڵی خەڵكە، لە ھەستی خەڵكەكە تێدەگەن، بەڵام نابنە دیلی ئەو ھەستە، جیاوازی كاریزماو خەڵك ئەوەیە، كاریزما پێیوایە دڵ و ھەست تەنیا بۆ دڵداری و شێعرو خەیال نیە، بەڵكوو دووانەی گەیشتن بەو پەری شكۆمەندیین، ھەربۆیە كاریزما ھەردووكیان لەجەستە و تەنانەت لاپەرە شێعرییەكان دەردەھێنێت و دەیانكاتە مانیفێستی رزگاری. بەگوتەی ماكس وێبەر كاریزماكان بەر لەوەی گۆرانێكی ئۆبژەكتیڤ بكەن، بە كوردییەكەی بەر لەوەی كەسێك یان بەرپرسێك بگۆرن، زەینییەت و تێروانینە باوەكان دەگۆرن، یان بەدیوێكی دیكەدا بۆچوونە دینامیكە لەبیركراوەكان زیندوودەكەنەوە. كاریزما لەوەش ناترسێت، ھەموو ئەوانەی كراون و ئەنجامی پێچەوانەیان ھەبووە، لە پرێكدا فرێبدات. ھەربۆیە كاریزمابوون ئەوەندەی عاقڵبوونە، ئەوەندە قارەمانبوون نیە. جیاوازی ئەو عاقلە لەگەڵ ئەوانیتر ئەوەیە كە كارسیرەر گوتەنی كاریزماكان بێ ئەوەی بزانن دەبنە ئوستوورە، بەڵام قارەمانەكانی دیكە لەو پەڕی گەشبینیدا دەبنە سەركردە. كاریزماكان پێشڕەو نین و، رێبوارن. كاریزماكان ڕووگە نین و رێگان. ئەوان رێرەوەكانیان ناترسێنن، دەیانبزوێنن. بەپێچەوانەی بۆچوونی باو، كاریزماكان رێبەرێكی سەرەتا كۆمەڵایەتین، چوونكە ھێڵی گەیشتن بەسەركەوتن بەھەناوی كۆمەڵگەدا دەكێشنەوە، ھێڵەكەش بە داروپەردووەكانی سەر رێگا درووستدەكات. ئامانجەكان كاریزماكان بەجیھانی دەكەن نەك رێگاكان، ھەربۆیە رێگای رزگاری كوردستان لە رێگاكانی دیكە ناچێت. رێگای رزگاری كوردستان رێك ئەو رێگایەیە كە پێشەوا درووستیكرد، مانای پێدا و لەپێناویدا شەھید بوو بۆ ئەوەی ھەرگیز كوێرە نەبێتەوە، پێشەوا ھەم كاریزماكەی وێبەرەو ھەمیش ئوستوورەكەی كارسیرەرە..
