تەنیا لە پارێزگای ورمێ ساڵانە ٢٤ هەزار تۆن هەنگوین بەرهەم دێت و لەئاستی ئێراندا لە پلەی یەکەمی زۆرترین و باشترین هەنگوین دایە. هاوکات رۆژهەڵاتی کوردستان بە ٤٠ هەزار تۆن بەرهەمی هەنگوینی ساڵانە جەمسەرێکی بەرچاوی هەنگوینی ناوچەکەیە. بەپێی بەدواداچوونەکانی رۆژهەڵات نیوز، ئەگەرچی بەرهەمی ئەمساڵی هەنگوین لە رۆژهەڵاتی کوردستان بەراورد بە ساڵی رابردوو زیادی نەکردووە، بەڵام هێشتاش زۆرترین و باشترین هەنگوینی ئێران و ناوچە هەر لە پێنج پارێزگای رۆژهەڵاتی کوردستان بەرهەم دێت. ئەمساڵیش پارێزگای ئورمییە لەئاستی ئێران لەپلەی یەکەمی زۆرترین بەرهەمی هەنگوین دایە، لەو پارێزگایە ئەمساڵ ٢٤ هەزار تۆن هەنگوین بەرهەم هاتووە، زیاتر لە ٤ هەزار کەسیش بەشێوەی بەردەوام و کاتی سەرقاڵی بەرهەمهێنانی هەنگوینن. دووەم پارێزگا کە زۆرترین هەنگوینی بەرهەم هێناوە، پارێزگای کرماشانە. تاکوو ئێستا لەو پارێزگایەش ٧ هەزارو ٥٠٠ تۆن هەنگوین بەرهەم هاتووە. پارێزگای لورستان ٥ هەزار تۆن، پارێزگای سنە ٢ هەزار تۆن و پارێزگای ئیلامیش هەزارو ٦٥٠ تۆن هەنگوینی لێ بەرهەم هاتووە. بەگشتی ئەمساڵ لە پێنج پارێزگای رۆژهەڵاتی کوردستان لانیکەم ٤٠ هەزار تۆن هەنگوین بەرهەم هاتووە.
.jpg)
