سەرۆکوەزیرانی ئەرمینیا و سەرۆککۆماری ئازەربایجان لە کۆشکی سپی و بە سەرپرشتی دۆناڵد ترامپ کۆتاییان بە ناکۆکییەکانی خۆیان هێنا و هاوکات لەمەو بەدوا کریدۆری زەنگەزۆریش بەفەرمی کرایە، کریدۆری ترامپ. ئەمرۆ هەینی دۆناڵد ١٧ی گەلاوێژ، دۆناڵد ترەمپ سەرۆککۆماری ئەمریکا لە کۆشکی سپی پێشوازی لەنیکۆڵ پاشینیان سەرۆکوەزیرانی ئەرمەنستان و ئیلهام عەلیفۆف سەرۆککۆماری ئازەربایجان کرد و هەر سێکیان لە کۆنگرەیەکی رۆژنامەوانیدا ئاشتی هەمیشەیی نێوان ئەرمەنستان و ئازەربایجانیان راگەیاند. دۆناڵد ترەمپ لە کۆنگرە رۆژنامەوانییەکەدا رایگەیاند:" ئەوان ٣٥ ساڵ شەڕیان کرد، ئێستا بوونەتە هاورێ و ئەو هاورێیەتییەش ماوەیەکی زۆر بەردەوام دەبێت." دۆناڵد ترەمپ ئاشکراشیکرد:" ئەرمەنستان و کۆماری ئازەربایجان پابەندیی خۆیان راگەیاندووە، بۆ هەمیشە کۆتایی بە شەڕی نێوانیان بهێنێنن، پەیوەندی بازرگانی و دیپلۆماتیک دەست پێبکەنەوەو رێزیش لەسەروەری و یەکپارچەیی وڵاتی یەکتر بگرن." هاوکات هەر لەو سەردانەدا رێککەوتنامەیەک لە سەر کریدۆری زەنگەزۆر واژۆ کرا، لەمەو بەدوا کریدۆرەکە ناوی لێنراوە، رێگەی ترەمپ بۆ ئاشتی و گەشەپێدانی نێودەوڵەتی کە کورتکراوەکەی دەبێتە TRIPP. گرنگترین بەشی ئەو رێککەوتنە ئەوەیە، رێگەی ستراتیژی نێوان کۆماری ئازەربایجان لەرێگەی خاکی ئەرمەنستان بۆ ناوچەی خودموختاری نەخجەوان دەکاتەوە، ئەوە هەمیشە خواستی باکۆ بووەو لەمپەرێکی بەردەم گفتوگۆکانیش بوو. لەمەو بەدوا کۆمپانیاییەکی ئەمریکا بۆ ماوەی ٩٩ ساڵ لەو کریدۆرەدا کار دەکات. رێککەوتنی کریدۆر یان رێگەی ترەمپ بۆ ئاشتی و گەشەپێدانی جیهانی، جگە لەوەی رۆڵ و نفوزی رووسیا لە ناوچەکە کەم دەکاتەوە، هاوکات شۆکێک و زیانێکی گەورەشە بۆ تاران. لەمەو بەدوا لەلایەک کۆمپانیاییەکی ئەمریکایی لەو رێرەوەدا دەبێ کە نزیکە لەسنوورەکانی ئێران، هاوکات ئەرمەنستانیش لە ئێران دوور دەخاتەوە. پێشینەی مێژوویی ناکۆکییەکان هەر لەسەردەمی یەکێتیی سۆڤییەتدا، ئەرمەنییەکانی قەرەباغ خوازیاری ئەوە بوون بگوازرێنەوە بۆ سەر ئەرمەنستان. هەر ئەو خواستە وایکرد لەکۆتاییەکانی ١٩٨٠ کوشتارێکی زۆری ئەرمەنییەکان بکرێت. لەکۆتاییدا هەر ئەوکات ئەرمەنستان و ئازەربایجان کەوتنە شەرێکی گەورەو نزیکەی ٣٠ هەزار کەس کوژران و سەدان هەزار کەسیش ئاوارە بوون. سوپای ئەرمەنستان جگە لە قەرەباغ، دەستی بەسەر بەشێک لە خاکی ئازەربایجان-دا گرت. ساڵی ١٩٩٤ بە سەرپرشتی رووسیا ئاگربەستێک لەنێوانیان هاتە ئاراوە، بەڵام پرسی قرەباغ بە چارەسەر نەکراوەیی مایەوە. هەر ئەوەش وایکرد، نێوە نێوە شەڕو پێکدادان لەنێوان هەر دوو وڵات رووبدات. سەرەتا شەڕی چواردە رۆژەی ساڵی ٢٠١٦، دواتر لە ساڵ ٢٠٢٠ ئازەربایجان دەستی بەسەر بەشێک لە ناوچەکاندا گرتەوە، ئەوکاتیش ئاگربەستەکە هەر بە نێوەندگیریی مۆسکۆ کرا و بەشێکی زۆر لە قەرەباغ لە کۆنترۆڵی کۆماری ئازەربایجاندا مایەوە. ئەمجارەیان ئەرمەنستان و کۆماری ئازەربایجان بە سەرپرشتی دۆناڵد ترامپ سەرۆککۆماری ئەمریکا رێککەوتوون و کۆتاییان بە ٣٥ ساڵ شەڕو ناکۆکی هێنا.
.jpg)
