ئێوارەی رۆژی یەكشەممە ھێزە حكومەتییەكانی كۆماری ئیسلامی ئێران پەلاماری كۆبوونەوەی ئاسایی ئەندامانی ئەنجوومەنی سەوزی چیایان داوە، بەپێی زانیارییەكانی RNA زیاتر لە 30 ئەندامی ئەو ئەنجوومەنە دەستبەسەر كراون و بۆ شوێنێكی نادیار گواستراونەتەوە، تاكوو ئێستا ھۆكاری ئەو رەشبگیرییەی ئەندامانی ئەنجوومەنی سەوزی چیا دیار نیە. ماڵپەری ھەنگاو ناوی 9 ئەندامی دەستبەسەركراوی ئاشكراكردووە كە بریتین لە سالار ئازەری، كەماڵ كۆنەپۆشی، مادح سەردوش، عەبدوڵڵا بەڵواسی، كاوە كەریمیان، كاوە داستان، جەماڵ قادری، ھیوا بابایی و عەلی عینایەت. بەپێی زانیارییەكانی RNA سەر لەبەیانی رۆژی دووشەممە بەشێك لە دەستبەسەركراوان ئازاد كراون، بەڵام سێ كەسیان بە ناوەكانی کاوەی داستان کاوەی کەریمیان، مادێح سەردۆش، ئەنجوومەنی سەوزی ئازاد نەكراون و تاكوو ئێستاش لەشوێنی راگیران و ھۆكاری دەستبەسەركرانیان ھیچ زانیارییەك بڵاونەكراوەتەوە. چیا دەیەوێ پێنجەمین ھەڵبژاردنی ئەنجوومەنی بەرێوەبەری و چاودێرەكان بەرێوەببات، ھەربۆیە لەو ماوەیەدا كۆبوونەوەی زۆری لە شارە جیاوازەكان و بەتایبەت لە مەریوان ھەبووە، بۆ ئەوەی بتوانێ ئەنجوومەنی بەرێوەبەری نوێ وەكوو نەریتی ئەنجوومەنەكە دیاری بكات.
