ناوەندی فەرماندەیی ویلایەتە یەکگرتووەکانی ئەمریکا ناسراو بە سەنتکام رۆژی سێشەممە ٢٦-ی بەفرانبار لەراگەیاندراوێکدا ئاشکرایکرد کە سوپای ئەمریکا رۆژی ٢١-ی بەفرانبار لە دەریای عەرەبی دەستیان بەسەر کەشتییەکدا گرتووە کە پارچە مووشەکی دروستکراوی ئێرانی تێدابووە، کە بۆ حوسییەکانی یەمەن نێردراوە. لەراگەیاندراوەکەدا هاتووە کە هێزە تایبەتەکانی ئەمریکا بە پشتیوانی درۆن و کۆپتەر لەو کەشتییە نزیکبوونەتەوەو دەستیان بەسەر سەرجەم پارچە مووشەکەکاندا گرتووەو کە هەموویان کروز بوونەو دروستکراوی ئێران بوونە. سەنتکام ئەوەشی ئاشکراکردووە کە لەبەدواداچوونە سەرەتاییەکانیان بۆیان دەرکەوتووە حوسییەکان رێک بەو مووشەکانە هێرش بۆ سەر کەشتییەکانی دەریای سوور دەکەن، کە ئێران بۆیان دەنێرێت. ناوەندی فەرماندەیی ئەمریکا راشیگەیاندووە هەر لەو ئۆپەراسیۆنەدا دوو سەربازیان دیار نەماون و گەران بەدوایاندا بەردەوامە. جۆن کێربی گوتەبێژی ئەنجوومەنی ئاسایشی نیشتمانی کۆشکی سپی سەبارەت بەو ئۆپەراسیۆنە رایگەیاندبوو کە ئەوە هەوڵێک و پەیامێکی واشنتن بۆ ئێران بووە کە پشتیوانی لەحوسییەکان دەکات. کێربی راشیگەیاندبوو کە ئەو ئۆپەراسیۆنە جیاوازە لەو ئۆپەراسیۆنانەی ئەمریکا و بەریتانیا بە هاوبەشی لە ناو یەمەن ئەنجامی دەدەن. هەر لەچوارچێوەی ئەو هۆشداریانە سەر لەبەیانی رۆژی هەینی ئەمریکا و بەریتانیا بۆ یەکەمین جار بە هاوبەشی چەندین بنکەو بارەگای سەربازی حوسییەکانیان لەناو خاکی یەمەن کردە ئامانج. رۆژی پێش ئەو ئۆپەراسیۆنە هەردوو وڵات رایانگەیاندبوو کە چیتر ناتوانن دان بەخۆیاندا بگرن و سەیری تێکدانی ئاسایشی رێرەوەکانی دەریای سوور لەلایەن حوسییەکانی نزیک لە ئێران بکەن. ئەو دوو وڵاتە پێشتریش بڕیارنامەیەکیان لە ئەنجوومەنی ئاسایشی نەتەوە یەکگرتووەکان لە دژی حوسییەکان پەسەند کردبوو. ئەو ئۆپەراسیۆنانەی ئەمریکا و بەریتانیا لەدژی حوسییەکان لەکاتێکدایە کە لەماوەی دوو مانگی رابردوودا حوسییەکان کەپشتیوانی کۆماری ئیسلامی ئێرانیان هەیە، لانیکەم ٣٠ جار لە دەریای سوور و کەنداوی عەدەن هێرشیان بۆ سەر کەشتییەکان کردووە.
