راپۆرت: رۆژهەڵات نیوز لە ١٢ رۆژی شەڕی ئیسرائیل و ئێران و تاکوو ئێستاش هەڕەشەو گوشاری سەر رۆژنامەنووسان و پەیجە هەواڵییەکانی ناوخۆی رۆژهەڵات بەردەوامە، بەشی پەیجەکان بۆ ئەوەی داوای ناوەندە ئەمنییەکان جێبەجێ نەکەن، چیتر پەیجەکانیان ئابدەیت ناکەنەوە. لە ١٢ رۆژی شەڕی نێوان ئیسرائیل و ئێران و تاکوو ئێستاش کەشێکی ئەمنی بەسەر رۆژهەڵاتی کوردستاندا زاڵە، زۆرترین گوشارەکانیش بۆ رۆژنامەنووس و ئەو پەیجانەن کە کاری خەبەری شاڕ یان ناوچەکەیان دەکەن، یان ئەو پەیجانەی زیاتر لە ٥ هەزار فالۆوەریان هەیە و زانیاری بڵادەکەنەوە. بەپێی زانیارییەکانی رۆژهەڵات نیوز، لەگەڵ دەستپێکردنی شەڕەکە ناوەندە ئەمنییەکانی ئێران (ئیدارەی ئیتڵاعات) و (حەفازەت ئیتڵاعاتی سوپای پاسداران) سەرەتا بە کورتە نامەو دواتر بە بانگکردنی ئەدمینی پەیجە هەواڵییەکان هۆشداریان پێ داون کە نابێ هیچ هەواڵێک بڵاوبکەنەوە، کە ورووژاندنی خەڵکی تێدا بێت. خاوەنی یەکێک لە پەیجەکانی ئینستاگرام کە زیاتر لە ١٠٠ هەزار فالۆوەری هەیە، بە رۆژهەڵات نیوزی راگەیاند، رۆژی سێیەمی شەڕەکە یەکەم کورتەنامەی لە ناوەندە ئەمنییەکان بۆ هاتووەو داوای لێکراوە، بۆ بڵاوکردنەوەی هەواڵەکان تەنیا سەرچاوە فەرمییەکانی ئێران و بە دیاریکراوی پەیجەکانی سەر بە سوپای پاسداران بکاتە سەرچاوەی هەواڵەکانی. ئەو خاوەن پەیجە ڕوونیکردەوە، جارێکیشیان لە حەوتەم رۆژی شەڕەکە بانگی حەفازەت ئیتڵاعاتی سوپای پاسدارانی شارەکەی کراوەو ژمارە تەلەفوونێکیان پێ داوە، کە دەبێ بۆ بڵاوکردنەوی هەواڵەکان لەگەڵ ئەو ژمارەیە لە پەیوەندیدا بێت. بەپێی بەدواداچوونەکانی رۆژهەڵات نیوز، دوای زیادکردنی گوشاری ناوەندە ئەمنییەکان، ئەدمینی پەیجە دیارەکانی رۆژهەڵاتی کوردستان کەوتوونەتە بەردەم دوو رێگە: یان بەپێی رێنوێنییەکانی ناوەندە ئەمنییەکان بجولێنەوە، یانیش واز لە نوێکردنەوەی پەیجەکان و دانانی هەواڵی نوێ بهێنن. رۆژهەڵات نیوز، بەدواداچوونی بۆ لانیکەم ٣٢ پەیجی ناوخۆی رۆژهەڵاتی کوردستان کردووە، کە سەروو ٥٠ هەزار فالۆوەریان هەیە، لەو ٣٢ پەیجە ١٨ پەیج ٩ رۆژ لە ١٢ رۆژی شەڕەکە هیچ هەواڵێکیان دانەناوە. (م.د) خاوەنی یەکێک لەو پەیجانە بە رۆژهەڵات نیوزی راگەیاند، بەناچاری وازمان لە دانانی هەواڵ و بابەتی نوێ هێنا، چوونکە یان دەبووا بەپێی رێنوێنییەکانی ناوەندە ئەمنییەکان بجولێینەوە، یان واز لە ئابدەیتکردنی پەیجەکانمان بهێنین. لە رۆژهەڵاتی کوردستان بەشێک لە ماڵپەرو پەیجەکان بە مۆڵەتی فەرمی لەلایەن خەڵک و رۆژنامەنووسی ئاسایی شارەکان بەرێوەدەچن، بەشێکیشیان راستەوخۆ سەر بە شارەداری و حەراسەتی پارێزگارو ناوەندە ئەمنییەکانی دیکەن. پەیج و ماڵپەرەکان هەتا رادەیەکی زۆر بەسەر پارێزگار یان شاڕەکان دابەشبوونە، زۆربەی شارەکان پەیجی تایبەتی خۆیان هەیەو هەتا رادەیەک بوونەتە سەرچاوەی هەواڵی دانیشتووانی شاڕ یان پارێزگاکانیان. ئەو پەیجانە کە زۆربەیان لە سەر تۆری کۆمەڵایەتیی ئینستاگرامن، لەگەڵ هەواڵ و ئاگادارکردنەوەکانی شاڕەکانیان هەواڵی گرنگی نێودەوڵەتیش بڵاودەکەنەوە، پەیجی رۆژنامەنووسانی سەربەخۆ رۆڵێکی گرنگیان لە بڵاوکردنەوەی هۆشیاری نەتەوەیی هەیە. لەبەرامبەردا پەیج و ماڵپەرە فەرمییەکانی سەر بە ئیدارەو ناوەندە ئەمنییە حکومییەکان زمانحاڵی رژێمن، هەر ئەوەش وایکردووە بە بەراوردێکی زۆر سادە بۆمان دەردەکەوێت، کە فاڵۆوەری پەیجی رۆژنامەنووسانی رۆژهەڵات لەهی ناوەندە فەرمییەکانی سەر بە دەسەڵات جێگەی متمانەپێکردنی زیاترن و فاڵۆوەریشیان زۆر زیاترە. گوشاری سەر رۆژنامەنووسان لەدوای شەڕی ١٢ رۆژەش هەر تەواو نەبووە، ئێستاش بۆ هەواڵی پەیوەندیدار بە لایەنە سیاسییەکانی رۆژهەڵاتی کوردستان یان پروپاگەندا لەدژی ئیسرائیل کورتە نامە بۆ خاوەن پەیجەکان دەنێردرێت، بۆ ئەوەی ئەو تێکست یان هەواڵانەی لەلایەن ناوەندە ئەمنییەکان بۆیان دەنێردرێت، لە پەیجەکانیان دابنێن. بۆ نموونە چەند رۆژ لەمەوبەر سەبارەت بە هەواڵێک لەسەر تێکهەڵچوونی گروپێکی چەکدار لەگەڵ سوپای پاسداران ئەو کورتە نامەیە بۆ زۆربەیان چووە: "بنا بە دستور ادارە فوری در تمام کانالهای سردشت و میرآباد درج گردد، عدم درج مسئولیت و پاسخگوی با مدیر کانال میباشد." نووسین و داوای هاوشێوە بە بەردەوامی بۆ رۆژنامەنووس و خاوەن پەیجەکانی رۆژهەڵاتی کوردستان دەنێردرێت و تاکوو ئێستاش ئەو دۆخە بەسەر رۆژنامەنووسانی رۆژهەڵاتی کوردستان-دا زاڵە. هەر ئەو گوشارانە وایکردووە، بەشی زۆریان بە ناچاری لەدوای شەڕی ١٢ رۆژە وازیان لە پەیجەکانیان هێناوە.
