ناوەندە ئەمنییەکانی رژێمی ئێران، چەندین جار حەسەن دەرئوفتادە باوکی شەهید کۆماریان گرتووەو هەڕەشەی ئەوەیان لێکردووە، ئەگەر رێورەسمی ٢٥ی گەڵاوێژ بگرێت، دەیکوژن. بەپێی بەدواداچوونەکانی رۆژهەڵات نیوز، دوای ئەوەی حەسەن دەرئوفتادە باوکی شەهید کۆمار دەرئوفتادە سەردانی بنەماڵەی دوا شەهیدانی ژینگەی کوردستان (چیاکۆ یووسفی نژاد، خەبات ئەمینی و حەمید مورادی) دەکات، ئێوارەی ئەو رۆژەی دەگەرێتەوە پیرانشار، لەلایەن ئیدارەی ئیتڵاعاتی ئەو شارە بانگ دەکرێت و سەبارەت بەو سەردانەی بۆ سنە هەڕەشەی لێدەکرێت. بەپێی زانیارییەکانی رۆژهەڵات نیوز، دوای ئەوە و زیاتر لە سێ جاری دیکە باوکی شەهید کۆمارو دەورووبەرییەکانی لەلایەن حەفازەت ئیتڵاعاتی سوپای پاسداران و ئیدارەی ئیتڵاعات بانگدەکرێن و هەڕەشەی ئەوەیان لێدەکرێت، کە نابێ لەرۆژی ٢٥ی گەلاوێژ رۆژی لەدایکبوونی شەهید کۆمار سەردانی گڵکۆکەی بکەن و رێورەسمی بۆ بگرن. دوایین جار هەڕەشەی ئەوە لە حەسەن دەرئوفتادە باوکی شەهید کۆمار دەکرێت، ئەگەر رێورەسمی ٢٥ گەلاوێژ بگرن وسەردانی گڵکۆی شەهید کۆمار بکەن، دەکوژرێن.
.jpg)
