سوپای پاسداران و وەزارەتی ئیتڵاعاتی ئێران لە رێگەی گروپە تاوانکارەکانی مادەی هۆشبەرو پیاوکوژە ماتۆر سوارەکان لە ئۆسترالیا تەقینەوەی ئەنجامداوەو ئاگریشی لە رێستۆرانتێکی یەهوودییەکان بەرداوە. دوای ئەوەی ئۆسترالیا بەهۆکاری ئەنجامدانی کاری تاوانکاری و تیرۆریستی بەفەرمی بالیۆزی ئێران لە وڵاتەکەی دەرکرد، بەدواداچوونەکان بۆ ئاشکراکردنی وردەکارییەکانی ئەو کارە تیرۆریستیانەی ئێران لە ئۆسترالیا دەستیپێکرد. ئێستا رۆژنامەیەکی ئەو وڵاتە لە راپۆرتێکدا وردەکاریی سرنجراکێشی سەبارەت بە گروپە تاوانکارەکانی گرێدراو بە ئێرانی بڵاوکردووەتەوە. رۆژنامەی "سیدنی مۆرنینگ هۆراڵد" لە بەدواداچوونێکی شیکاریدا وردەکاری ئاگرتێبەردانی ریستۆرانتی "لۆئیس کانتینتاڵ کیچن" و تەقاندنەوەی کنێسەی "ئاداس ئیسرائیل"-ی لە میڵبۆرن بڵاوکردووەتەوە. پێشتر حکومەتی ئۆستراڵیا رایگەیاندبوو، ئێران ناوەندە ئەمنیی و هەواڵگرییەکانی لەرێگەی تۆرێکی گروپی ناوخۆیی ئەو دوو هێرشەی لەدژی یەهوودییەکانی ئۆسترالیا ئەنجامداوە. ناوەندی زانیارییەکانی هەواڵگری ئۆسترالیا (ASIO)-ش ئاشکرایکردووە، هەردوو هێرشەکە لەرێگەی گروپی تاوانکاری ناوخۆیی و بەسەرپرشتی ناوەندە ئەمنییەکانی ئێران کراون. رۆژنامەی "سیدنی مۆرنینگ هۆراڵد" دەستی بە بەڵگەنامەکانی دادگای ئۆستراڵیا گەیشتووەو تێیدا هاتووە ژمارەیەک گروپی تاوانکارو گەنگستەر کە خۆیان بە سیخۆرە ناودارەکان ناساندووە، لەو هێرشانەدا بەشداریان کردووە. بەپێی راپۆرتی رۆژنامەکەو بەگشتی میدیاکانی ئۆسترالیا، کەسێک بەناوی "سەید مووسەوی" تۆمەتباری سەرەکییە، بەپێی بەڵگەکان ئەو سەید موسەوییە بەناوی "جەیمز بۆند" ناسراوەو سەرکردایەتی گروپێکی تاوانکاری ماتۆرسوار دەکات و، لەرێگەی ئەپلیکەیشنی "سیگناڵ" ئەندامەکانی گروپەکەی ئاراستە کردووە. لەبەڵگەنامەکاندا هاتووە، سەید مووسەوی شەوی ٣٠ سێپتەمبەری ٢٠٢٤ هاوکارێکی خۆی بەناوی "وین ئەگدن" ئاگادار دەکاتەوە کە "کارێکی باشیان لەبەردەم دایە." دوو هەفتە دواتر ئەگدن لەگەڵ کەسێکی دیکە بەناوی جۆن ئامووئی بە ئۆتۆمبیلێکی هیوندای سپی و بە دەمامکی رەش بەرەو دوو شوێنی دیاریکراو دەکەونە رێ بۆ ئەوەی بیانتەقێننەوە، بەڵام ئەوکات ناتوانن کارەکە تەواو بکەن، ئەوەش سەید موسەوی ناسراو بە "جەیمز بۆند" تووڕە دەکات و نامەیەکیان بۆ دەنێرێت کە بەدەست پۆلیسی ئۆسترالیا کەوتووەو تێیدا هاتووە:" ئەو کارە ئاسانەتان پێ نەکرا، منداڵێکی ١٦ ساڵان دەیتوانی بیکات." رۆژنامەی "سیدنی مۆرنینگ هۆراڵد" ئاماژە بە دووەم هەوڵی ناسەرکەوتووی ئەو گروپە بە سەرکردایەتی سەید موسەوی دەکات، بەڵام لەسێیەم هەوڵدا ئۆگدن بۆ کۆتایی هێنانی کارەکە، دەچێتە رێستۆرانتی لوئیس کانتینتاڵ کیچن و کاتژمێر ٢:٣٠ خوڵەکی سەر لەبەیانی بە بەنزین ئاگڕی تێبەردەدات. ئاگڕەکە زۆر گەورە دەبێت، جگە لە ریستۆرانتەکە خانووەکانی دەورووبەریشی چۆڵی دەکەن و ئاگڕەکە زیاتر لە یەک میلیۆن دۆلار زیانی لێدەکەوێتەوە. دواتر بکەڕانی و تەنانەت سەید موسەوی ئاراستەکەریشیان دەستبەسەر دەکرێن. سەید موسەوی "جەیمز بۆند" کێیە؟ رۆژنامەی "سیدنی مۆرنینگ هۆراڵد" ئاشکرایکردووە، سەید موسەوی ساڵی ٢٠٠٥ لە ئەفغانستانەوە چووەتە ئۆستراڵیا، پێشتر چەندین تاوانی ڕفاندن، مادەی هۆشبەر، تووندوتیژی و تاوانی چەکداری کردووە. بەرپرسی ناوەندی هەواڵگری ئۆستراڵیا (ASIO) ئاشکرایکردووە، سوپای پاسداران لەرێگەی چەند رایەڵە پەیوەندی بە گروپە تاوانکارەکان و بەتایبەت گروپە تاوانکارە ماتۆرسوارەکانی ئۆستراڵیا هەبووە. گروپەکەی سەید موسەویش یەکێک لەو گروپانە بووە، کە لەلایەن ناوەندە ئەمنیی و هەواڵگرییەکانی ئێران ئاراستە کراون. ئانتۆنی ئاڵبانز سەرۆکوەزیرانی ئۆستراڵیا رایگەیاند، بەڵگەکانیان سەڵمێنەری ئەوەن کە سوپای پاسداران رۆڵی لە ئاگرتێبەردانی رێستۆرانتەکەو تەقاندنەوەی کڵێسەکەی مێڵبۆرن هەبووەو ئەوەش لەدژی یەهوودییەکانی وڵاتەکەی بووە، بە وتەی سەرۆکوەزیرانی ئۆستراڵیا ئەو کارەی ئێران کردوویەتی، لەدوای شەڕی جیهانی دووەم نموونەی نەبووە، هەربۆیە سەرجەم پەیوەندییە دیپلۆماسییەکانیان لەگەڵ تاران راگرتووە.
.jpg)
