جەماوەری ئەمەگناس، ژینگەپارێزان و نیشتمان‌پەروەرانی هێژا! هەروەک ئاگادارن، ساڵگارانێکە ژینگەی نیشتمان بە گشتیی کەوتوەتە بەر هێرش و پەلاماری تاڵانچییان و داگیرکەرانێک کە بەلێشاو و بەربڵاوی، دارستان و لێڕەوار و سامانی سروشتی و نەتەوەییمان بەشێوازگەلی قێزەوەن وەک: ئاگرتێبەردان و بنەبڕکردنی دارستانەکان، بە دەرهێنانیان بۆ باخ و خەڵوزکردن و بڕین و تاڵانی دارە بەتەمەنە بەنەرخەکان کە شوناس و بوون و مێژوی نەتەوەیەکیان لەخۆ گرتووە، بووە بە تراژیدیای تاڵی ئەم سەردەمە تاریکە. زنجیرە ئاگرەکانی زیاتر لە دوو دەیەی دارستان و لێڕەوارەکان، بڕست و هێزی لە ژیان چنیووە و لە گرفت و کێشە و قەیرانەوە بەرەو کارەسات و ماڵ وێرانییەکی یەکجاری ئەڕوات. ئەم دۆخە مەترسیدار و ڕووخێنەرە، دەرئەنجامی یاسای لاواز و پلان و داڕشتنی ناشارەزا و دوور لەهەر جۆرە پێوەرە زانستی و سەردەمییەکانە و هەروەها لە بەرژەوەندی تاقمێکی هەلپەرەست و کاربەدەستانی نابەرپرسدا بووە. ڕوونکردنەوەیەک بۆ ڕای گشتی و کورتە ئامارێک لەسەر ئاگرتێبەردان و قەڵاچۆی دارستانەکان، لە ساڵی ١٤٠٤دا ؛ ئێمە وەک ڕێکخراوە ژینگە پارێزییەکانی پارێزگاکانی ورمێ، سنە، کرماشان و ئیلام جەخت و پێداگری لە سەر ئەم خاڵانە دەکەینەوە. ١-دیاردەی ئاگرنانەوە بەهەر هۆکارێک دەستکردە و پێویستە لایەنی دەسەڵات، لەهەمبەر ئەم قەیرانە خۆی بە بەرپرس بزانێت و وڵامدەر بێت. ٢-ئێمە وەک ڕێکخراوە ژینگەپارێزییەکان یاساکانی پەیوەندیدار بە ژینگەوە، بە ناتەواو و ناکارا دەزانین و پێداچوونەوە و گۆڕینی ئەو یاسایانە بە شێوەی سەردەمییانە بەئەرکی سەرەکی دەسەڵات ئەزانین. ٣- ئەو فەرمانگە پەیوەندیدارانەی کە ئەرک و فرمانیان بە سەقەتی بەڕێوە ئەبەن، ئەبێت بە ڕوونی و ئاشکرا لە لایەن دەزگای دادەوە لێپرسینەوەیان لێ‌بکرێت و سزا بدرێن. ٤-دادستانەکان وەک سەرەکیترین بەرپرسی لێکۆڵینەوە، بەئەرکی سەرشانی خۆیان هەستن و تاوانبارانی ئاگرەکان بەسزای شیاو بگەیەنن و ڕوون‌کردنەوە بۆ ڕای گشتیی بدەن. ٥- بەپێی بڕوامان بە پەروەردەی سەردەمییانە و کارامە ڕوو لە بەشی فەرمی پەروەردە ئەکەین و ئەڵێین؛ هیچ هەنگاوێکی شیاوتان بۆ پەروەردەی ژینگەیی هەڵ نەگرتووە. ئەرکە لە سەر دام‌ودەزگا پەروەردەییەکان کارئاسانی بکەن بۆ پەیوەندیی نێوان قوتابییان و ژینگەپارێزان، لە پۆلی وانەی قوتابخانەکان‌دا. ۶- داوامان لە مامۆستایانی بەڕێزی ئایینییە وەک هەمیشە، بە ئەرکی ئایینی و ئەخلاقی خۆیان هەستن و ڕای بگەیەنن؛ ژینگەی نیشتمانەکەمان مەترسی لەناو چوونی لەسەرە، عەرەب وتەنی: (حب الوطنی من الایمان) بەدرێژایی مێژووی کوردستان، هەڵمەتی بوێرانە و هەڵوێستی شەرافەتمەندانەی حوجرە و مامۆستایانی ئایینی، تەواوکەری چالاکییە ژینگەیی و خەڵکییەکان بووە و ئاگادارکردنەوەی خەڵکی لە بواری ئایینییەوە، بۆ باشتر کەڵک‌وەرگرتن و پاراستنی کانیاو و دارستان و لێڕەوارەکانی کوردستان، ئەتوانێت باشترین خزمەت بێت بۆ ئایین و کۆمەڵگا و نیشتمانە پیرۆزەکەمان. ٧-لەبەر ئەوەی ژیانی گوندنشینان و ئاسایش و ئارامیی کۆمەڵگای کوردستان، ڕاستەوخۆ بەستراوە بە شاخ و کانیاو و دارستانەکانی ئەم وڵاتە ڕەنگینەوە، ئەرکی سەرەکی خزمەت و پاراستنی ئەوانەیش ئەکەوێتە ئەستۆی کەسانی دڵسۆز و نیشتمان‌پەروەر، بەتایبەت لە دێهاتەکاندا، هەر بۆیە داواکارین لە کۆمەڵگای بە ئەزمون و شارەزای گەلەکەمان؛ بەرەنگاری پیلانی گڵاوی کاولکاران و تاڵانچیانی نیشتمانەکەمان ببنەوە. ٨- داوامان لە ژینگەپارێزان و کەسانی خاوەن هەڵوێستە بەرانبەر بە ژینگە؛ تکایە بە بێ ڕاهێنان و پەروەردەی زانستی ڕووبەڕووبوونەوەی قەیران، ڕێگە بە کەسانی ناشارەزا و ئەندامانتان مەدەن بچنە سەر ئاگر. با هەوڵ و تێکوشانەکانمان بۆ پاراستنی ژینگە بخەینە ئەستۆی بەشی پەروەردە و ڕاهێنانی کۆمەڵگا. ژینگە هەرچەند پارێزاو بێت و لەسەر جێگەی خۆی بێت، بە بێ خەڵک و خاوەنی ڕاستەقینەی خاک، قازانجی چییە؟ خاکی چۆڵی پارێزراو و نەپارێزراو کەڵکی چییە؟ لە کۆتاییدا هۆشداری به لایەنی دەسەڵات ئەدەین، ئەگەر به ئەرکه یاساییه‌کانی خۆی هه‌ڵنەستێت و درێژه بەم بێده‌نگی و ڕەوتی قات‌وقڕ کردنە واتاداره لەمەڕ کاولکارییەکان نەدات، بێگومان کاردانەوەی جه‌ماوەری لێ دەکەوێتەوە. ڕێکخراوە ژینگەییەکانی پارێزگاکانی ورمێ، سنە، کرماشان و ئیلام.
