کابینەی ئەمنییەتی ئیسرائیل رۆژی پێنجشەممە پرۆژەی نەتانیاهۆ بۆ داگیرکردنی هەموو غەزەی پەسەند کرد و هاوکات ترەمپ و نەتانیاهۆ لەسەر ئەو پرۆژەیە ناکۆکیان هەیەو لە پەیوەندییەکی تەلەفوونیدا بە تووندی قسەیان لەگەڵ یەکتر کردووە. ماڵپەری ئەکسیۆسی ئەمریکا، ئاشکرایکردووە کابینەی ئەمنییەتی ئیسرائیل بە زۆرینەی دەنگ پرۆژەی بنیامین نەتانیاهۆ سەرۆکوەزیرانی ئیسرائیلی بۆ داگیرکردنی غەززەی بۆ لەناوبردنی حەماسی پەسەند کردووە. بەپێی پرۆژەکە سوپای ئیسرائیل دەبێ کۆنترۆڵی غەززە بکات، ئێستا زیاتر لە ٨٠٠ هەزار کەس لە غەززەدا دەژین. هەر زوو نووسینگەی سەرۆکوەزیرانی ئیسرائیل لە بەیاننامەیەکدا ئەو هەواڵەی ئەکسیوسی پشتراست کردەوەو رایگەیاند کابینەی ئەمنییەتی-سیاسی وڵات لەپێناو لەناوبردنی حەماس پرۆژەی بنیامین نەتانیاهۆی پەسەندکردووە. بەپێی پرۆژەکە لەگەڵ ئەوەی دەبێ ئیسرائیل غەززە کۆنترۆڵ بکات، بەڵام لەهەمان کاتدا بەرپرسیارییەتی یارمەتی مرۆیی خەڵکی مەدەنیش دەگرێتە ئەستۆ. پێشتر میدیاکانی ئیسرائیل و هەندێک سەرچاوەی ئەمریکاش باسیان لە ئامانجی نەتانیاهۆ بۆ داهاتووی غەززە کردبوو. ئەو پرۆژەیە لەماوەی چوار بۆ پێنج مانگ بەرێوەدەچێت و کۆنترۆڵی هەموو غەززە دەکەوێتە دەستی ئیسرائیل. ئامانجی سەرەکیش ئەوەیە کۆی بنکەکانی حەماس لەناو ببات و هاوکات گوشارێکیش بۆ ئازادکردنی ٥٠ باڕمتەکەی لە حەماس بکات. هەر زوو ئەو پرۆژەیەی ئیسرائیل ناکۆکی نێوخۆیی و نێودەوڵەتی لێکەوتەوە. کەناڵی ئێن بی سی پێشتر ئاشکرایکردبوو کە دۆناڵد ترەمپ سەرۆککۆماری ئەمریکا و بنیامین نەتانیاهۆ سەرۆکوەزیرانی ئیسرائیل لەپەیوەندییەکی تەلەفوونیدا سەبارەت بە دۆخی غەززە ناکۆکیان لێ پەیدا بووە. نەتانیاهۆ بەتووندی رەتیکردووەتەوە لە غەززە قەیرانی مرۆیی روویدابێت و بە دۆناڵد ترەمپی وتووە هیچ پرۆژەیەکیان بۆ برسی کردنی خەڵکی مەدەنی غەززەیان نەبووەو نیە. لە هەمان کاتدا، سوپای ئیسرائیلیش بەر لە پەسەندکردنی پرۆژەکەی بنیامین نەتانیاهۆ بۆ کۆنترۆڵکردنی هەموو غەززە هۆشداری دابوو، جێبەجێکردنی ئەو پرۆژەیە رەنگە گیانی بارمتە ئیسرائیلییەکان بخاتە مەترسییەوە، هاوکات ئەگەری درێژەکێشانی شەڕەکەو درووستبوونی شەڕی ناو شاڕەکانی زۆر دەکات. بەڵام لەگەڵ ئەوانەش بنیامین نەتانیاهۆ رایگەیاندووە، هەتا کۆتایی پێهێنانی حەماس لە ئۆپەراسیۆنەکانیان بەردەوام دەبن و تاکە رێگەی گەیشتن بەو ئامانجەش ئەوەیە کۆنترۆڵی هەموو غەززە بگرە دەست.
.jpg)
