نووسینی: ئاشور عەلی دوو مانگ دوای ئەو شەڕەی کە ژێرخانی ئەتۆمی ئێرانی پەکخست، کۆماری ئیسلامی ئیران زیاتر لە جاران لە دووڕیانێکی ستراتیژیدایە، ئەوروپا هەڕەشەی چالاککردنی "ئیسنپ‌بک"ی کردووە کە ئەگەر ئەنجام بدرێت، سزاکانی نەتەوە یەکگرتووەکان دەگەڕێنێتەوە و ئێران بەبێ قەڵغانی چین و ڕووسیا گۆشەگیر دەکات. لەم چوارچێوەیەدا لێدوانی بێ وێنەی پزشکیان سەرۆک کۆماری ئێران سەبارەت بە بێتوانایی وڵات لە بنیاتنانەوەی دامەزراوە ئەتۆمییەکان و تەنانەت دابینکردنی ئاو، وێنەیەکی توندی لە واقیعی ئەمڕۆی ئێران کێشا، سیستەمێک کە نە توانای ئابووریی هەیە بۆ بەرەنگاربوونەوەی فشارە دەرەکییەکان و نە چارەسەری قەیرانە ناوخۆییەکان. کاردانەوەی توندی میدیا بناژۆخوازکان (باڵی توندڕەوی کۆماری ئیسلامی ئێران) بەرامبەر بەم تێبینیانە زیاتر ڕەنگدانەوەی ترسە لە قبوڵکردنی ئەم واقیعە نەک نیشانەی هێز. هێشتا ٤٠٠ کیلۆگرام یۆرانیۆمی پیتێنراوی ئێران لەسەر مێزە، بەڵام ڕێگری(Deterrence) ڕاستەقینە داڕمایە و شەڕی ئەم دواییە دەریخست کە مووشەک و پرۆکسی ناتوانن ئیسرائیل لەناو ببەن، وەک ئەوەی تاران پێیوابوو. لە هەمان کاتدا قەیرانی ئاو و داڕمانی ئابووری ناڕەزایەتی کۆمەڵایەتی کردۆتە هەڕەشەیەکی ڕاستەقینە بۆ کۆماری ئیسلامی ئیران، هەڵبژاردنی بەردەم کۆماری ئیسلامی ئیران ڕوونە، یان پاشەکشەکردن بۆ ڕێککەوتنێکی ئەتۆمی نوێ و تێچووی زۆر، یان گەڕانەوەی گەمارۆ پەکخستنەکان و مەترسی تەقینەوەی کۆمەڵایەتی، لە هەردوو سیناریۆکەدا ئەوەی لەدەست دەچێت تەنها سەنتەرفیوژەکان یان کۆگاکانی یۆرانیۆم نییە، بەڵکو دوا شوێنەواری ڕێگریکردن و شەرعیەتی سیستەمێکە کە تادێت زیاتر نوقمی قەیرانەکان دەبێت.
