کەمپەینی بەرگری لە چوار بەندکراوی سیاسی لە راگەیاندراوێکدا ئاشکرایکردووە کە رژێمی کۆماری ئیسلامی ئێران لە دادگاییەکی کورت و رووکەشدا سزای لەسێدارەدانی بەسەر چوار بەندکراوی سیاسیدا سەپاندووە. دەقی راگەیاندراوەکە: راگەیاندنی کەمپەینی پشتیوانی لە چوار بەندکراوی سیاسی کورد: تاوانیکی دیکە لە ڕێ دایە! بە پێی ئەو هەواڵانەی بەدەستمان گەیشتووە، بەداخەوە سزای سێدارەی چوار بەندکراوی سیاسی کورد بە ناوەکانی: پژمان فاتحی، موحسین مەزلووم، محەمەد فەرامەرزی و وەفا ئازەربار لە پڕۆسەیەکی خێرا و دادگایەکی کورت و فەرمایشی دەرچووە. ئەو چوار کەسە زیاتر لە یەک ساڵ و نیوە لەژێر گوشار و ئەشکەنجە و ئازاردان. لە نادیاربوونی چارەنووس و بێدەنگییەکی تەواودا بەسەر دەبەن و ڕژیمیش هەتا ئێستا وڵامدەری بارودۆخیان نییە. ئەو سزا نامرۆڤانە و نادادوەرییە ئاشکرایە لە دادگایەکی ناعادڵانە و لەکاتێکدا دەردەکرێ کە لە هەموو ئەم ماوەیەدا، لە شوێنێکی تایبەت و شاراوە ڕاگیراون و لە مافی دەسڕاگەیشتن بە دادڕەسییەکی عادڵانە، دەستڕاگەیشتن بە زانیاری و وردەکارییەکانی دۆسیەکە، مافی هەڵبژاردنی پارێزەر، مافی چاوپێکەوتن لەگەڵ بنەماڵە و سەرجەم مافە سەرەتاییەکانی بەندکراوێک بێبەش بوون. سەرجەم قۆناغەکانی دەستبەسەربوون، لێپرسینەوە و لێکۆڵینەوە و دادڕەسی تا دەرکردنی سزاکەیان لە ناڕوونی تەواو و بە شێوەی نهێنی و شاراوە و لێڵ و خێرا ڕوویداوە و مەترسی ئەوە هەیە قۆناغەکانی جێبەجێ کردنی سزاکەشیان هەر بەم شێوەیە بێت. هەر بەم بۆنەوە لە سەرجەم ئازادیخوازان، هەڵسووڕاونی مافی مرۆڤ و چالاکانی مەدەنی، ڕاگەیاندنە سەربەخۆ و ناوەندەکانی مافی مرۆڤ و نێونەتەوەیی داوا دەکەین بە شێوەی جیددی و بە خێرایی لە هەمبەر دەرکردنی ئەو سزا ناعادڵانە و زاڵمانەیە هەڵوێست بنوێنن و بۆ ڕزگارکردنی گیانی ئەو چوار کەسە، تەواوی هەوڵ و تواناکانیان بخەنە گەڕ. هیوادارین بە هاوکاری ئێوەی ئازیز پێش بە قوربانی‌بوونەوەی ڕۆڵەکانمان و دووپاتبوونەوەی جینایەت و تاوانێکی دیکە لەلایەن کۆماری ئیسلامیەوە بگرین. کەمپەینی پشتیوانی لە چوار بەندکراوی سیاسی کورد ١٦ی بەفرانباری ١٤٠٢ی هەتاویی
